اسلام آباد ۔ 06 دسمبر (اے پی پی) وزیراعظم عمران خان دسمبر نا آخیریکو ہفتہ سی پیک نا رداٹ فیصل آباد نا پوسکن آعلامہ اقبال انڈسٹریل سٹی نا بناءِ کیک ۔ انڈسٹریل سٹی نا اڈتننگ آن درملکی و ہندی زرکارآتے گچین آسراتی دوبریک و ملک اٹی معاشی سرجزآتے مون آ دننگ دوئی مریک ۔ فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی (فیڈمک) نا چیئرمین میاں کاشف اشفاق جمعہ نادے آ میڈیا تون گپ و تران کرسا پارے کہ دا ہیت بے کچ ستاکڑزک کہ وزیراعظم عمران خان تینا پورو چکار ءِ ملک اٹی معاشی نمو آ کرینے ۔ واپار و زرکاری ساڑی حکومت نا خارجہ پالیسی تا اسہ اہم ءُ تمبہ سے ہرانا سوب آن پاکستان نا بابت مچ آ دنیا ٹی اسہ مثبت سوچ اس شون ہلکونے ۔ فیڈمک نا شونداری ڈٹ آتے مون آ تخسا میاں کاشف اشفاق پارے کہ دا ڈٹ اٹی کم و ود 357ارب روپئی نا پیشن نا و ہندی زرکاری مننگ ءِ ہرا داہیت انا درشانی ءِ کہ حکومت زرکارآتاپورو پت دوئی کرینے ۔ علامہ اقبال انڈسٹریل سٹی 4ہزار ایکڑ رقبہ غا جوڑ کننگانے ہرا موٹروے ایم فور آ ساہیاں والا انٹرچینج فیصل آبا د نا خڑک واقع ءِ ۔ دانا مین بولیوارڈ ، داخلی گیٹ و باءونڈری وال ءِ شش تُوانا تہہ ٹی پورو کننگک ۔ علامہ اقبال انڈسٹریل سٹی ٹی چندی وڑنا پوسکن آ صنعتی یونٹ جوڑ کننگک ۔ شار انا چندی گنجان علاقہ غاتے ٹی مست آن جوڑ صنعتی یونٹ آتے ہم دا پوسکن آ انڈسٹریل اسٹیٹ اٹی منتقل کننگک ۔ اوپارے کہ وزیراعلیٰ پنجاب عثمان بزدار ہم دا ڈٹ انا زوت پوروی ٹی است خواہی ہلنگ ءِ و تعلقدار کمامدارآتے او پیدوار پارت کرینے کہ دا ڈٹ انا پوروی نا کسر اٹی بروک آ اڑاند آتے زوت آن زوت پورو کننگے ۔ میاں کاشف مستی پارے کہ فیڈمک نا رداٹ چندی ڈٹ آتے ٹی روزگار نا دونیم لکھ وارخواہی ودی مننگ نا گمان ءِ ۔ ورناتے پوسکن و پوسکن وڑنا ملازمت آتے کن تیار کننگ نا غرض اٹ فیڈمک تعلقدار بشخ آتے کن گونڈ وختی تربیتی کورس اس بناکنگ نا ڈٹ جوڑ کننگ ءِ ۔ اوپارے کہ بے روزگاری ملک ءِ مون تروک بھلا چیلنج آتیان اسٹ ءِ ۔ ورلڈ بینک انا ساڑی آ حساب وکتاب نار داٹ کم و ود 6درسد پاکستانی بے روزگار ءُ و داویل ءِ ایسر کننگ کن روزگار نا پوسکن ءُ وارخواہی ودی کننگ نا گرج ءِ ۔ تربیت یافتہ و کسب کار مزور و انجینئر آتے نئے بیرہ خصوصی اقتصادی زون اٹی گچین ملازمت ملنگ کیک بلکن چینی و ہندی کمپنی تے ہم ہندی وڑاٹ تربیت یافتہ افرادی قوت دوبننگ کیک ۔ اوپارے کہ ایکسپورٹ پراسیسنگ زون انا غٹ صنعت ، پلانٹس، مشینری، خام مال و ایلو گڑاتے 10 سال اکن خراج آن استثنیٰ دوئی مریک ۔ اوپارے کہ اسٹریٹجک گیگ بدل نا حیثیت اٹ سی پیک نا اہمیت بھاز زیات ءِ داڑان معاشی سرجزآتے ہم مون آ دننگ انگءِ ۔ اوپارے کہ فیڈمک جہانی زرکار آتے چکنگ کن اِراسال انا تہہ ٹی کاروباری آسانی تا درجہ بندی ءِ پین گچین و 100 آن کم کننگ کن پرعزم ءِ ۔
