اسلام آباد ۔ 06 دسمبر (اے پی پی) وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان پارینے کہ وزیراعظم عمران خان سوگو و شونہال پاکستان کن سخت خواری کننگ ءِ ، پاکستان مسلم لیگ (ن) نا راہشون شہباز شریف نا غیر جمہوری و غیر آئینی خواست آتے امنا کننگ مفک ۔ نجی ٹی وی چینل تون گپ وتران کرسا اوپارے کہ اپوزیشن السی مخ تفی آن ہنانے، مسلم لیگ(ن) نا راہشون شہباز شریف داسہ بایدے چار سال انتظار کے، اودے جمہوری حکومت نا برخلاف منفی چم بازی آ مایوسی مریک، اندرون خانہ بدلی نا بارواٹی شہباز شریف نا تران آ ردعمل نا درشانی ءِ کرسا ڈاکٹر فردوس عاشق اعوان شہباز شریف ءِ پارے کہ او اول تینا پارٹی ٹی اندرون خانہ بدلی اتے او تینٹ مسلم لیگ (ن) نا سینئر سرکڑدہ غاتا دوتے ٹی کٹھ پتلی جوڑ مسنے، اودے تینا پارٹی ٹی فیصلہ ہلنگ نا اختیار اف ۔ اوپارے کہ مسلم لیگ (ن) نا کماش دا بلیک میلنگ چم بازی تا کمک اٹ الس آن ہمدردی دوئی کننگ و سیاسی پوائنٹ سکورنگ کننگ خواہک ولے اوبایدے یات تخے کہ تدوک آ لس گچین کاری تیٹی الس اوفتے یکسر مستر د کریسس و پاکستان تحریک انصاف نا مخلص سرکڑدہ غاتے وونٹ تسوسر ۔ اواپوزیشن آ زور شاغا کہ او پارلیمنٹ اٹی کانود سازی نا بابت زمواری ءِ پورو کے و اوفک تحریک انصاف نا گچین مروک جمہوری پارٹی سرکڑدہ غاتا بایدے شرف ءِ کیر ۔ اوپارے کہ ہراتم اپوزیشن لیڈر آک اقتدار اٹی مریرہ تو او پارلیمنٹ نا شرف ءِ کیرہ ولے ہراتم او اقتدار آن پیش مرسا او وزیراعظم عمران خان آ تنقید کننگ ءُ ۔ اوپارے کہ ہر پاکستانی مستین اٹی (ن)لیگ نا کرپشن آن مایوس ءُ و منفی ایجنڈاتا پد اٹ حقیقت ءِ چارہ ۔ اوپیدوار کرے پی ٹی آئی نا حکومت وڈی خوری آ وخت اس ہم سمجھوتہ کپک و وزیراعظم عمران خان سوگو و شونہال پاکستان کن سخت خواری کننگ ءِ ۔ فردوس عاشق اعوان پارے کہ حزب اختلاف نا ارمانک وخت اس ہم پورو مفسہ و اوفتے المی وڑاٹ مایوسی تون مون تروئی تمک ۔ اوپارے کہ حزب اختلاف تینا منی لانڈرنگ و وڈی خوری نا باندات آتیا پڑدہ شاغنگ خواہک ۔