
اسلام آباد ۔ 06 دسمبر (اے پی پی) بنجائی وزیر ڈٹ بندی ، شونداری و اصلاحات و خصوصی گام گیج اسد عمرپارینے کہ اینخو مالی سال اٹی ملک اٹی بڑزکو تعلیم نا شونداری ڈٹ آتیا 30 ارب روپئی خڑچ کننگک ۔ داخیال آتا درشانیءِ او جمعہ نادے آ بنجائی وزیر تعلیم و کسبی تربیت شقفت محمود تون اوڑدہی ٹی کرے ۔ اوڑدہی ٹی بڑزکو تعلیم نا شونداری فنڈ آتا حالیت آتا جاچ ءِ ہلنگا ۔ داوخت آ ڈپٹی چیئرمین پلاننگ کمیشن محمد جہانزیب خان، چیئرمین ایچ ای سی طارق بنوری و ایلو بڑزکو عہدیدار آک ہم ساڑی ئسر ۔ اوڑدہی ٹی پاننگاکہ شونداری فنڈ آتا جاری کننگ نا عمل ءِ پوسکن ءُ دروشم اس تننگانے و پرنسپل اکاءونٹنگ آفیسرز(پی اے او) ءِ زیات اختیار تننگانے ، داوخت اسکان وزارت ڈٹ بندی 29 ارب روپئی آن ہائر ایجوکیشن کمیشن ءِ 11;46;4 ارب روپئی شونداری ڈٹ آتے کن تسنے ۔ وزیر ڈٹ بندی اسد عمر تعلقدار عہدیدار آتے پارت کرے کہ ایچ ای سی ءِ جتا کروک آ ایلو پیسہ غاتے وخت آ جاری کننگے تانکہ تعلیمی ادارہ غاک اوفتے تینا ڈٹ آتے کن کاریم اٹ اتنگ کیر ۔ او چیئرمین ایچ ای سی ءِ پارے کہ او داہیت ءِ پک کے کہ جاری کروک فنڈ آتے سمجھداری و گچین وڑاٹ خڑچ کے ۔ اوڑدہی ٹی طالب علم آتا اندراج اٹی گچینی و تعلیم نا آب ءِ گچین کننگ نابابت وزارت تعلیم نا سلاہ تیا ہم گپ و تران کننگا و فیصلہ کننگاکہ وزارت تعلیم داڈٹ آتے عملی دروشم اس تننگ کن باضابطہ سلاہ اس تیار کیک ہرادے ڈٹ بندی کمیشن تجاویز نا ڈیزائن و منظوری نا عمل اٹ آسانی فراوان کیک ۔ بنجائی وزیر آک سائنس و ٹیکنالوجی، انفارمیشن ٹیکنالوجی و ٹیلی کام نا وزارت آتون نالج اکانومی نا ڈٹ آتا جاچ ءِ ہلنگ نا ہم فیصلہ ءِ کریر ۔