کوءٹہ ۔ 05دسمبر (اے پی پی) اینو’’قومی ووٹرز ڈے‘‘ ءِ اڈتننگ نا مسخت دادے کہ الس اٹی وونٹ انا اہمیت نا شعور ءِ بیدار کننگے و اوفتے باور کرفنگے کہ جمہوریت نا سوگوی کن وونٹ آتا اندراج و ووونٹ بٹنگ اسہ قومی ءُ فرض اسے ۔ داخیال آتا درشانی ءِ او صوبائی الیکشن کمشنر بلوچستان فیاض حسین مراد ووٹرز ڈے انا مناسبت اٹ اڈ ہلوک آ صوبائی دود آن تران کرسا کرے ۔ اوپارے کہ ہمو غٹ بندغ آک تینا وونٹ آتا اندراج ءِ پک کیر ہرا شناختی کارڈ تخرہ ولے اوفتا پن گچین کاری فہرست آتے ٹی رجسٹرڈ اف ۔ خاص کر زالبول آتیان خواست ءِ کہ تینا وونٹ انا رجسٹریشن ءِ پک کیر ۔ بلاشبہ آزادانہ ، منصفانہ و شفاف گچین کاری تا اڈتننگ کن غلطی تیان پاک گچین کاری فہرست آتا ساڑی مننگ بنداوی گرج ءِ ہراڑکن لازم ءِ کہ اہل ووٹر گچین کاری فہرست آتے ٹی درج مریر و دا فہرست آتیا ووٹرز و اومیتدار ہڑتوم آک است جم مریر ۔ ہنداخاطران دا اہمیت ءِ مون آ تخسا الیکشن کمیشن عموما و وقتا فوقتا خصوصی گام گیج کرسا کیک تانکہ غٹ اہل ووٹرآتا اندراج گچین کاری فہرست آتے ٹی کننگ مرے ۔ ای اینو نا دے انا مناسبت اٹ ووٹر آتا چکار ءِ گچین کاری ایکٹ 2017 ء نا دفعہ 27 نا کنڈا کرفنگ خواوہ ہرانار داٹ داسہ وونٹ آتا اندراج قومی شناختی کارڈ اٹی تروک آ آخبتی یا عارضی ڈس آ ہی ممکن ءِ ۔ ہنداخاطران غٹ ووٹرز آک 8300 آ تینا شناختی کارڈ نمبر ءِ ایس ایم ایس کرسا تینا وونٹ انا کواءف ءِ چیک کیر و آخبتی یاعارضی ڈس آن بیدس مسٹ میکو ڈس آ وونٹ درج مننگ نا حالیت اٹ تعلقدار ضلعی الیکشن کمشنر آفس تون رابطہ کیر و تینا وونٹ ءِ آخبتی یا عارضی ڈس آ منتقل کرفر ۔ دامسخت کن مورخہ 4 دسمبر 2019 آن گچین کاری فہرست آتے مچ آ ملک اٹی ضلعی کہول آ چندی ڈسپلے سینٹر آتیا خلنگانے ۔ دود آن تران کرسا مہمان خاص مسکوہی صوبائی الیکشن کمشنر سید سلطان بایزید وونٹ انا اہمیت ءِ مون آ تخسا پارے کہ الیکشن کمیشن نا دا گام گیج ستاکڑزک کہ ہر سال قومی ووٹرز ڈے انا وڑاٹ بھاز بست و بند اٹ اڈتننگک ۔ دا وڑنا دود آتیان الس و خاص کر ووٹرآتے دا کلہو ملک کہ الیکشن کمیشن و حکومت پاکستان ہرا حد اسکان ملک اٹی جمہوریت و جمہوری عمل ءِ سوگو کننگ کن مخلص ءُ ۔ دا قومی دے انا مناسبت اٹ ہمو بندغ آک ہرافتا پنک بحیثیت ووٹر داوخت اسکان درج متنو اوفتے تینا وونٹ آتے درج کرفنگ نا شعور ملک ۔ دُن کہ نمے معلوم ءِ کہ پوسکن آ گچین کاری کانود نار داٹ داسہ وونٹ آتا اندراج قومی شناختی کارڈ اٹی تروک آ آخبتی یا عارضی ڈس آ ہی ممکن ءِ ۔ ہنداخاطران ای الس آن خواست کیوہ کہ تینا وونٹ آتا کواءف ءِ چیک کیر و مسٹ میکو ڈس آ درج مننگ نا حالیت آتے ٹی تینا وونٹ ءِ تینا آخبتی یا عارضی ڈس آ منتقل کرفر ۔ ای دا وخت آ غٹ بشخ ہلوک آتا خاص کر السی نمائندہ ، سول سوساءٹی آرگنائزیشن و میڈیا غان اومیت کیوہ کہ او الیکشن کمیشن آف پاکستان نا دا کوشست آتون پبی تفرہ و ہر کہول آ الس خاص کر ووٹرز آتیا زور شاغرہ کہ او تینا شناختی کارڈ انا رداٹ آخبتی یاعارضی ڈس آ تینا وونٹ آتا اندراج ءِ پک کیر ۔ اوپارے کہ پاکستان نا ہر شاری ءِ وونٹ آتا اندراج نا چرجوئی ٹی ہروڑ کمک فراوان کننگے تانکہ زیات آن زیات خلقت تینا وونٹ آتا اندراج و منتقلی ءِ کرفنگ کیر ۔ دود آن علاءو الدین خلجی ریزیڈنشل ڈائریکٹر عورت فاءونڈیشن ئسک ہم تران کرے او الس اٹی وونٹ انا اہمیت ءِ تالان کننگ کن الیکشن کمیشن نا کنڈآن کروک آ گام گیج آتے مون آ تخسا پارے کہ الیکشن کمیشن ڈسٹرکٹ ووٹر ایجوکیشن کمیٹیز کیپلیٹ فارم آن ووٹرز خاص کر زالبول ووٹرز آتا اندراج و حق رائے دہی نا کاریم اٹ اتنگ نا اہمیت آن آگاہی مہم اسے نا بناءِ کرینے ستاکڑزک ۔ دا مہم آن ووٹرنئے بیرہ الیکشن نا اہمیت آن معلومدارمریرہ بلکن الیکشن اٹی اسہ اومیت دار اسے گچین ہم کیرہ ۔ الیکشن کمیشن نا کماشی ٹی زالبول، معذور و خواجہ سرا تے کن اسہ ورکنگ پڑک اس ہم کاریم کننگ ءِ تانکہ الیکشن کمیشن راج انا گوجالوک آ تپہ غاتے ہم گچین کاری فہرست آتے ٹی اوار کننگ مرے ۔ دود اٹی آفیسر آک سول سوساءٹی آرگنائزیشن و سیاسی جماعت آتا باسک آک ہم بشخ ہلکر ایسر اٹی صوبائی الیکشن کمشنر بلوچستان غٹ مہمان تا منت واری ءِ ہرفے ۔ دود انا ایسر اٹ ووٹر آتا آگہی کن واک اسے نا بست و بند کننگا ۔
