سینیٹ نا قائمہ کمیٹی پٹرولیم نا چیئرمین سینیٹر محسن عزیز نا ’’اے پی پی‘‘ تون گپ و تران

کول مائنز اٹی ہردے مروک آ شکست و مزور آتا مرک آتیان پد ہم بلوچستان حکومت و تعلقدار محکمہ غاتا کارکڑد مایوس کن ءِ

کوءٹہ ۔ 05دسمبر (اے پی پی) سینیٹ نا قائمہ کمیٹی پٹرولیم نا چیئرمین سینیٹر محسن عزیز بلوچستان نا کول مائنز اٹی مزور آتا حالیت و آسراتی تا مفننگ آ گڑتی نا درشانی ءِ کرسا پارے کہ کول مائنز اٹی ہردے مروک آ شکست و مزور آتا مرک آتیان پد ہم بلوچستان حکومت و تعلقدار محکمہ غاتا کارکڑدگی مایوس کن ءِ ، داخیال آتا درشانی ءِ او پنچ شنبے نادے آ کوءٹہ نا علاقہ سنجیدی، سورنج اٹی کول مائنز نا دورہ غان پد ایسوسی ایٹڈ پریس آف پاکستان تون خصوصی گپ وتران کرسا کرے ۔ سینیٹر محسن عزیز پارے کہ بلوچستان نا کول مائنز اٹی مروک آ شکست آتیان پد ہم مزور آتا حالیت و شہید آتے معاوضہ غاتا ادائیگی نا جاچ ءِ ہلنگ نا سینیٹ نا قائمہ کمیٹی پٹرولیم نا خصوصی دیوان اس جمعہ نادے آ کوءٹہ ٹی تخانے تانکہ کول مائنز اٹی شکست آتا توننگ و مزور آتا حالیت ءِ گچین کننگ تون اوفتے ٹریننگ نا فراوانی تون حکومت و غٹ تعلقدار محکمہ غاتے کن جامع سلاہ و سوج مرتب کننگ مرے ۔ اوپارے کہ کول مائنز اٹی فرسٹ ایڈ و دوائی تا فراوانی المی ءِ تانکہ شکست آتا درشم اٹ وخت آ مزور آتا درمان ءِ کننگ مرے ۔ وخت اس کہ شکست آتے ٹی کم آن کم نسخان کن مزور آتا باقاعدہ تربیت نا جامع نظام اس جوڑ کننگ کن سینیٹ نا قائمہ کمیٹی پٹرولیم جمعہ نادے آ تینا دیوان اٹی غٹ اسٹیک ہولڈرز آتا سلابت اٹ تینا سلاہ و سوج آتے پیش کیک ۔