اسلام آباد ۔ 05 دسمبر (اے پی پی) چیئرمین سینیٹ محمد صادق سنجرانی پارینے کہ پاکستان و سعودی عرب سنگتی نا لازوال رشتہ غاتے ٹی تفوک ءُ ، اسیجا مذہبی ، تاریخی ، دودوربیدگی و راجی مماثلت ہڑتوم آ کنڈآتا کمکاری ءِ پین سوگوی ایترہ ، پاکستان سعودی عرب تون کمکاری ءِ اہم سرپند کیک ۔ داخیال آتا درشانی ءِ او پنچ شنبے نادے آ سعودی شوریٰ کونسل نا چیئرمین ڈاکٹر محمد بن عبداللہ شیخ تون اوڑدہی ٹی کرے ۔ اوڑدہی ٹی تین پہ تینی است خواہی نا باندات آتون اوار اہم معاملہ غاتیا سرجم گپ و تران کننگا ۔ چیئرمین سینیٹ پارے کہ پاکستان و سعودی عرب سنگتی نا لازوال رشتہ غاتے ٹی تفوک ءُ ۔ اسیجا مذہبی ، تاریخی ، دودوربیدگی، و راجی مماثلت ہڑتوم آ کنڈآتا کمکاری ءِ سوگوی ایتک ۔ پاکستان سعودی عرب تون کمکاری ءِ اہم سرپند کیک ۔ واپار و زرکاری نا بشخ آتے ٹی ہڑتوم آ کنڈآتا کمکاری ءِ مون آ دننگ کن بھلو گنجائش اس ساڑی ءِ ۔ اوپارے کہ سعودی زرکارآک پاکستان اٹی زرکاری نا وارخواہی تیان فائدہ ہرفنگ کیرہ ۔ ادارہ جاتی کہول آ ڈل آتا ہن و بر اٹی پین ترندی اتنگ نا گرج ءِ ۔ پارلیمانی کمکاری ءِ پین مربوط کننگ وخت انا اہم ءُ گرج اسے ۔ چیئرمین سینیٹ سعودی عرب نا ولی عہد محمد بن سلمان نا دورہ پاکستان ءِ ہم ہڑتوم آ ملک آتے کن بے کچ اہم گوندسا پارے کہ سعودی ولی عہد نا دورہ غان ہڑتوم آ کنڈآتا کمکاری کن پوسکن ءُ کسر آوار مس ۔ سعودی عرب نا کنڈآن بھلو زرکاری اسے ٹی جہانی برادری نا پاکستان آ پت ودانے، امت مسلمہ ءِ داوخت آ مشکل آتون مون تروک ءِ ۔ چیئرمین سینیٹ پارے کہ ہڑتوم آ ملک آتا نیام اٹ تعلقداری تا سوگوی آن حالیت آک گچینی نا کنڈاکارہ ۔ پاکستان سینیٹ و سعودی شوریٰ کونسل نا نیام اٹ ادارہ جاتی کمکاری ءِ ہم سوگو کننگ ناگرجءِ ۔ چیئرمین شوریٰ کونسل ڈاکٹر محمد بن عبداللہ الشیخ چیئرمین سینیٹ محمد صادق سنجرانی نا منت واری ءِ ہرفسا پارے کہ پاکستان سعودی عرب کن بے کچ اہم ءُ ملک اسے و نن پاکستان تون تینا ہڑتوم آ کنڈآتا تعلقداری تے بے کچ اہمیت ایتنہ ۔ ہڑتوم آ ملک آتا الس نا اسہ ایلو تون تین پہ تینی مہر و مریبت نا رشتہ ءِ ۔ اوپارے کہ پاکستان سینیٹ و سعودی شوریٰ کونسل نا نیام اٹ ادارہ جاتی کمکاری آبایدے سہی پیش رفت مرے ۔ اوپارے کہ ہڑتوم آ ملک آتا نیام اٹ تعلقداری بے مثل ءُ ۔ اسلامی دنیا ٹی پاکستان اسہ جتا ءُ شناخت نا ملک اسے ۔ داوخت آ سینیٹر حافظ عبدالکریم ہم ساڑی ئس ۔
