اسلام آباد ۔ 05 دسمبر (اے پی پی) اسپیکر قومی اسمبلی اسد قیصر پارینے کہ پاکستان و سعودی عرب مذہب ، اخوت ، تاریخ و دودوربیدہ نا لازوال رشتہ غاتے ٹی تفوک ءُ ، پاکستان سعودی عرب تون تینا خوشگوار برادرانہ تعلقداری تے قدر انا نظر اٹ ہرک، پاکستان نا الس سعودی عرب تون استی وابستگی تخک، سعودی عرب مشکل نا ہر ساہت اٹی پاکستان تون تفینے ۔ داخیال آتا درشانی ءِ او پنچ شنبے نادے آ چیئرمین سعودی شوریٰ کونسل ڈاکٹر عبداللہ بن محمد الشیخ نا کماشی ٹی سعودی پارلیمانی ڈل اتون اوڑدہی ٹی کرے ۔ اوڑدہی ٹی ہڑتوم آ کنڈآتا تعلقداری، امت مسلمہ ءِ مون تروک چیلنج آتون اوار اہم علاقائی و جہانی باندات آتیاگپ و تران کننگا ۔ اسد قیصر پارے کہ پاکستان و سعودی عرب مذہب ، اخوت ، تاریخ و دودوربیدگ نا لازوال رشتہ غاتے ٹی تفوک ءُ، پاکستان سعودی عرب تون تینا خوشگوار برادرانہ تعلقداری تے قدر انا نظر اٹ ہرک، پاکستان نا الس سعودی عرب تون استی وابستگی تخک ۔ اوپارے کہ سعودی عرب مشکل نا ہر ساہت اٹی پاکستان تون تفینے ۔ سعودی عرب پاکستان نا خاص انگا دوست ملک ءِ و پاکستان ءِ سعودی عرب تون تینا سنگتی آ گمر ءِ ۔ اوپارے کہ مقبوضہ کشمیر نا الس بدترین ریاستی دہشتگری نا گواچی ءُ ۔ تدوک آ 122 دے آن کرفیو نا نافذ مننگ نا سوب آن مقبوضہ کشمیر نا الس تینا اُراتے ٹی بند ءُ ۔ اوپارے کہ کشمیر نا ویل آ مسلم ملک آتا پارلیمان تا دمدستی کانفرنس اس بٹنگ انگے ۔ بھارت اٹی بی جے پی نا فاشٹ حکومت نئے بیرہ کشمیر بلکن مچ آ بھارت اٹی مسلمان تیا زند ءِ تنگ کرینے ۔ اسد قیصر پارے کہ مسلمہ امہ ءِ مون تروک ویل آتا ایسری کن و اسلاموفوبیا نا چٹفنگ کن مسلم ملک آتا نیام اٹ سیوت المی ءِ ۔ اوپارے کہ ناروے ٹی قرآن پاک نا بے حرمتی نا واقعہ بے کچ است ہسون و بے کچ شرمناک ءِ ، دا واقعہ غان مچ آ امت مسلمہ نا است آزاری مس ۔ دُن انگا واقعہ غاتا توننگ کن او آئی سی ءِ فعال کڑد ادا کننگ نا گرج ءِ ۔ ہڑتوم آ ملک آتا پارلیمان تیٹی پدریسہ رابطہ ہڑتوم آ برادر ملک آتے ٹی تعلقداری تے سوگو کننگ اٹ اہم کڑد اس ادا کننگ کیک ۔ سعودی پارلیمانی ڈل انا ساڑی آ دورہ غان ہڑتوم آ کنڈآتا کمکاری نا پوسکن ءُ کسر ملنگک ۔ اوڑدہی ٹی چیئرمین سعودی شوریٰ کونسل ڈاکٹر عبداللہ بن محمد الشیخ پارے کہ سعودی عرب پاکستان ءِ تینا مخلص سنگت و ایلم تکک ۔ ہڑتوم آ ملک آتا نیام اٹ سنگتی نا رشتہ ہر گدرینگوک آ دے اتون سوگو مننگ ءِ ۔ اوپارے کہ سعودی عرب کشمیر نا ویل انا اقوام متحدہ نا قرارداد و کشمیر ی الس نا است خواہی تا رداٹ دمدستی ایسری اس خواہک ۔ کشمیری الس تون سلوک اُن و اوفتے تون پورو یکجہتی نا درشانی ءِ کینہ ۔ اوپارے کہ سعودی عرب کشمیر تون اوار غٹ تنازعہ غاتا مذاکرات نا کمک اٹ زوت آن زوت ایسری ءِ خواہک ۔ کشمیر و فلسطین نا مسلمان تیا مروک آ ظلم آتا مذمت ءِ کینہ ۔ کشمیر آ اسلامی ملک آتا پارلیمانی نمائندہ غاتا کانفرنس ءِ بٹنگ انگ نا سلاہ غان امنا کینہ ۔ کشمیر اٹی لاک ڈاءون ءِ دمدستی وڑاٹ چٹفنگے و دامان اٹی مروک آ انسانی حق آتا خلاف ورزی تے توننگے ۔ مسلم ملک آتے ٹی ہم گرنچی ءِ مون آ دننگ و امہ ءِ مون تروک ویل آتا ایسری کن پاکستان نا کڑد ستاکڑزک ۔ اوپارے کہ سعودی عرب نا الس پاکستان ءِ تینا ارٹ میکو اُراسرپند کیک ۔ ہڑتوم آ کنڈآتا واپار ءِ مون آ دننگ کن اسیجالاءحہ عمل اس مرتب کننگ کن ہڑتوم آ ایوان تا واپار نا کمیٹی تیٹی پدریسہ رابطہ غاتا گرج ءِ ۔
