لاہور ۔ 05دسمبر (اے پی پی) الس ءِ جان جوڑی نا آب اٹ آسراتی تا فراوانی حکومت نا اولیت ءِ، وزیراعظم عمران خان دا بشخ آ خصوصی چکار کرینے، طبی تعلیم ءِ مون آ دننگ کن پالیسی اس جوڑ کننگ نا گرج ءِ ۔ داخیال آتا درشانی ءِ وزیر مملکت جان جوڑی ڈاکٹر ظفر مرزا یونیورسٹی کالج آف میڈیسن اینڈ ڈینٹسٹری ، یونیورسٹی آف لاہور اٹی اڈ ہلوک آ مسٹ میکو جہانی طبی تعلیمی کانفرنس آن تران کرسا کرے ۔ ملائیشیا ، دمام و مصر آن تعلق تخوک آ طبی چاہندار آک ہم کانفرنس اٹی بشخ ہلکر ۔ وزیر مملکت پارے کہ نن وخت اس ہم دا حقیقت آ سجفتون کہ داڑے ہرا حد اسکان نرسز، ڈاکٹرز و پرامیڈیکس آتا گرج ءِ ، ننا طبی سسٹم اٹی اسہ خلا اسے، دا اولیکو وار مسنے کہ حکومت نا خصوصی است خواہی نا سوب آن ملکی کہول آ طبی پالیسی نا بابت ہیت کننگ انگ ءِ ۔ دا ننا طبی اصلاحی ایجنڈا نا اسہ اہم ءُ پہلو سے ۔ اوپارے کہ پاکستان اٹی نرس آتا کچ نسبتا پیشن نا ملک آتیان کم ءِ ہمیڑے اسہ ڈاکٹر تون چار نرس وخت اس کہ داڑے چار ڈاکٹر تون اسہ نرس اس کاریم کیک ۔ اوپارے کہ ننے نرسنگ پروفیشن ءِ اپ گریڈ کننگ نا گرج ءِ ۔ اوپارے کہ وزیر اعظم عمران خان جان جوڑی نا بشخ اٹی خصوصی چکار کرینے ہرانا سوب آن پوسکن ءُ اصلاحات اتنگ انگ ءِ ۔ اوپارے کہ ننا یونیورسٹی ٹی نرسنگ کن 3سال انا کورس آخا بلکن پیچلرز ڈگری پروگرام اس بناکننگ انگ ءِ ، ننے ملک ءُ سہی کسر آ اتوئی ءِ ۔ اوپارے کہ پال کنفوک آ لمہ غاک و 50 درسد حاملہ زالبول آئرن نا کمتی نا گواچی ءُ وخت اس کہ 40 درسد چناتا گروتھ ریٹ کم ءِ ۔ اوپارے کہ جان جوڑی نا بشخ اٹی الس کن دمدستی اصلاحاتی گام گیج آتا گرج ءِ ، داڑکن غٹ طبی ادارہ غاتا کمک درکارءِ ۔ اوپارے کہ ننے طبی پروفیشنل آتے الس نا حالیت آتیان معلومدار کروئی ءِ، ننے پرائمری کہول آ طبی گرج آتا رسینگ ءِ الس اسکان سرکروئی ءِ ، ہر اسٹ کن بریبر طبی آسراتی مہیا کروئی ءِ ۔ اوپارے کہ نن لیڈی ہیلتھ ورکرز نا کاریم نا کچ اٹی ودکی کینہ، وزیر مملکت پارے کہ الس نا ہردے ئی کٹیا 2ڈالرز آن کم ءِ ، نن اوفتے کن جان جوڑی انصاف کارڈ مہیا کرینن، حکومت الس نا راجی آسراتی نا زمواری ءِ ہلکونے ۔ نن 50 لکھ خلقت ءِ کٹیا فراوان کننگ اُن، کرارکرا ر آ شونداری مننگ ءِ ، ننا ٹارگٹ یک و نیم کروڑ بندغ ءِ کٹیا تننگ نا ءِ ۔ ایسر اٹ وزیر مملکت اہم شخصیت آتے ٹی سووینیئر ہم بشخا ، پروفیسر ڈاکٹر شاہد محمود ملک چیئرپرسن ریکٹر یونیورسٹی آف لاہور، پروفیسر ڈاکٹر ریحان احمد خان چیئرپرسن سائینٹیفک کمیٹی ہم کانفرنس اٹی ساڑی ئسر ۔
