اسلام آباد ۔ 05 دسمبر (اے پی پی) وزیراعظم نا خصوصی کمکار قومی جان جوڑی ڈاکٹر ظفرمرزا پارینے کہ حکومت ملک آن پولیو نا پورو چٹفنگ کن پالیسی اس اختیار کننگ ءِ ۔ اے پی پی تون گپ و تران کرسا ڈاکٹر ظفر مرزا پارے کہ حکومت بروک آسال اٹی ملک آن پولیو نا چٹفنگ کن پرعزم ءِ ۔ اوپارے کہ ملک آن پولیو نا انسداد اٹی سیاسی عنصر آتا نیام تمنگ نا چٹفنگ کن نیشنل سٹریٹجک ایڈوائزری پڑک اس جوڑ کننگ انگ ءِ ۔ اوپارے کہ غٹ عالم دین و حزب اختلاف نا جماعت آتے دا پڑک اٹی اوار کننگک تانکہ دا بابت مون تروک انت کہ اڑاند اس مرے اوفتے مر کننگ مرے ۔ خصوصی کمکار پارے کہ مسہ صوبہ غاتے ٹی پولیو نا مرض انا بابت زیات خطرہ نا حامل گڑاس یونین کونسل آک ءُ و دا کونسل آتے ٹی پولیو وائرس نا پورو چٹفنگ کن گام گیج کننگ انگ ءِ ۔ اسہ سوج اسے نا ورندی ٹی او پارے کہ ہمو عنصر و خاہوت آتا پیدواری نا بابت ہم ڈٹ بندی کننگ انگ ءِ ہرا تینا چناتے پولیو آن بچفنگ نا پڑی کُنفنگ آن پاناد ءُ و پولیو کارندہ غاتا کاریم اٹ نیام تمنگ و اوٹی اڑاند ودی کننگ ءُ ۔
