ملک اٹی زرکاری کن چاگڑدسازگارءِ، 2030ء اسکان 60 درسد آن زیات بجلی بدل اٹ توانائی نا وسیلہ غاتیان جوڑ کننگک، بنجائی وزیر بجلی عمر ایوب خان نا کوریا نا سفیر تون گپ وتران
اسلام آباد ۔ 05دسمبر (اے پی پی) بنجائی وزیر بجلی عمر ایوب خان پارینے کہ ملکی معاملہ غاتے ٹی شفافیت ءِ مون آ دننگ آن اڑاند آک مر مننگ ءُ ، ملک اٹی زرکاری کن چاگڑد سازگارءِ ، 2030 ء اسکان 60درسد آن زیات بجلی بدل اٹ توانائی نا وسیلہ غاتیان جوڑ کننگک ۔ داخیال آتا درشانی ءِ او پنچ شنبے نادے آ کوریا نا سفیر کواک سنگ کیو تون اوڑدہی ٹی کرے ۔ اوڑدہی ٹی توانائی، ٹیکنالوجی گدریفنگ و اسہ ایلو نا آزموندہ و چاہنداری آن ہیل کننگ آ امنا کننگا ۔ بنجائی وزیر توانائی نا بشخ اٹی حکومت نا کنڈآن کروک آ گام گیج آتے مون آ تخسا پارے کہ غٹ باندات آتے ٹی شفافیت ءِ برجا تخنگ اولیت ءِ، شفافیت نا مون آ دننگ آن اڑاند آک مر مننگ ءُ و ملک اٹی زرکاری کن سازگارچاگڑد اس مہیا مسنے ۔ اوکورین کمپنی تا گل پور و ہشت ہند آتے ٹی ہائیڈرو پروجیکٹ آتا ستاءِ کرینے ۔ بنجائی وزیر کورین کمپنی تا کنڈآن پاکستان اٹی پین زرکاری ٹی است خواہی و عملی گام گیج آتیا منت واری ءِ ہرفے ۔ بنجائی وزیر بدل اٹ توانائی نا بارواٹی کورین سفیر ءِ معلومدار کرسا پارے کہ 2030 اسکان شست درسد آن زیات بجلی دا وسیلہ غاتیان جوڑ کننگک ۔ اوپارے کہ کیہی یورپین ملک آک، چین و ایلو ملک آک پاکستان اٹی سولر پینل، ونڈ ٹربائن جوڑ کننگ نا فیکٹری تے پاکستان اٹ خلنگ کن کاریم کننگ ءِ ۔ کورین کمپنیک ہم پاکستان اٹی دا فیکٹری تے خلنگ کیرہ انتئے کہ آخبت اٹی نئے بیرہ پاکستان بلکن نیامی ایشیائی اواری اٹ برآمد کننگ نا ہم خاصہ وارخواہی ءِ ۔ بنجائی وزیر غٹ زرکار آتے اسہ وڑ کاروباری آسراتی تننگ نا درشانی ءِ کرے ۔ غٹ ادارہ غاتے پارت تننگانے کہ ہروڑنا کمک اسہ چھت انا کیرغ فراوان کننگے ۔ داوخت آ کورین سفیر پاور ڈویژن نا ساڑی آ گام گیج آتا ستاءِ کرے ہرافتا سوب بھاز انگا پاور پروجیکٹ آک پورو مسنو ۔ کورین سفیر پارے کہ داڑان زرکارآتا پت بحال مسنے ۔ اوپارے کہ چندی کورین کمپنیک پاکستان اٹی زرکاری نا است خواہ ءُ و پاکستان نا انرجی سیکٹر نا بابت غٹ معلومداری تے یکجا کننگ ءِ ۔ اوپارے کہ ساڑی حکومت نا پالیسی تا سوب آن انرجی سیکٹر دنیا نا چوٹی نا زرکارآتا چکار نا وت جوڑ مسنے ۔
