اسلام آباد ۔ 05 دسمبر (اے پی پی) وزیراعظم نا خصوصی کمکار امور نوجوانان محمد عثمان ڈار پارینے کہ حکومت غٹ سیاسی معاملہ غاتے مذاکرات نا کمک اٹ ایسر کیک ۔ پنچ شنبے نادے آ اسہ نجی ٹی وی چینل اسے تون گپ و تران کرسا اوپارے کہ اپوزیشن جماعت آتون ہچ ءُ وڑاسے نا ڈیڈلاک اس اف انتئے کہ حکومت ملک انا گچین فائدہ غاتے ٹی غٹ سیاسی معاملہ غاتے اپوزیشن تون مذاکرات اٹ ایسر کننگ خواہک ۔ اوپارے کہ پاکستان تحریک انصاف نا حکومت وزیراعظم عمران خان نا کماشی ٹی ملک ءِ مون تروک ویل آتا ایسری کن کاریم کننگءِ ۔ اواومیت ظاہر کرے کہ حکومت و حزب اختلاف نا نیام اٹ مذاکرات نا عمل برجاسلک ہرا جمہوریت نا حسن ءِ ۔ محمد عثمان ڈار دا اومیت نا درشانی ءِ کرے کہ حزب اقتدار و حزب اختلاف نا نیام اٹ ویل آتے مذاکرات نا کمک اٹ ایسر کننگک ۔ اوپارے کہ پی ٹی آئی نا حکومت ملک اٹی سیاسی چاگڑد ءِ گچین کننگ کن پبی کوشست کننگ ءِ و اپوزیشن الیکشن کمیشن آف پاکستان نا باسک و چیف الیکشن کمشنر نا تقرری تون اوار ایلو غٹ ریاستی باندات آتے کن مذاکرات نا عمل نا بناءِ کرینے، اومیت ءِ کہ بروک آ دے تیٹی غٹ باندات آتے مذاکرات نا کمک اٹ ایسر کننگک ۔ اوپارے کہ منہ دے اٹی نن چیف الیکشن کمشنر و سندھ و بلوچستان آن الیکشن کمیشن نا باسک آتا پن تیا امنا کینہ ۔ مسکوہی صدر آصف علی زرداری نا جان جوڑی نا بابت گپ و تران کرسا اوپارے کہ کانود نا نظر اٹ غٹ بریبر ءُ و ہچ کس کانود آن ایڑتر اف، حکومت ہر شاری تون بریبر نا سلوک کیک ۔ اوپارے کہ پی ٹی آئی نا حکومت نا مشن ءِ کہ سرسہبی ہمووخت اسکان ملنگ کپک ہراوخت اسکان ہر شاری کن بریبر کانود ءِ پک کننگپ ۔ محمد عثمان ڈار پاکستان مسلم لیگ (ن) و پیپلزپارٹی نا راہشون تیا تنقید کرسا پارے کہ او سیاست توپاکستان اٹی کننگ خوارہ ولے تینا درمان ءِ پیشن نا ملک آتیان کرفنگ نا خواہش مند ءُ ۔ اوپارے کہ اگہ عدالت آصف علی زرداری ءِ موکل ایتک تو حکومت داٹی نیام تمپک ۔ اوپارے کہ ہر شاری تون کانود نا ررداٹ سلوک کننگک ۔ اوپارے کہ حکومت آصف علی زرداری نا جان جوڑی آ میڈیکل بورڈ انا سلاہ و سوج آتا رداٹ عمل کننگک ۔ اوداہیت آ زور شاغا کہ نن پرامن و شونہال پاکستان کن اواری اٹ بایدے کاریم کین و قوم انا فائدہ غاتیا ہچ ءُ سمجھوتہ اس کننگپک ۔ اسہ سوج اسے نا ورندی ٹی اوپارے کہ حکومت اپوزیشن نا غیر آئینی و غیر جمہوری خواست آتے امنا کپک ولے اوفتا آئینی خواست آتے امنا کننگک ۔
