صوبائی حکومت آنی جوڑیشت ءِ شوبگ ءِ ھوالگ ءَ صوبائی ٹیکسز آنی استیں سیم سر آنی کم کنگ ءِ سر ءَ چار ءُُ بچار کنگ ءِ پنت ءُُ شون
اسلام آباد ۔ 05 دسمبر (اے پی پی) مزن وزیر عمران خان ءَ گوشت کہ جوڑیشتی شوبگ ءِ دیمروئی حکومت ءِ اولی کار آنی تہ ءَ ھوار انت چیا کہ جوڑیشت ءِ شوبگ ءِ دیمروئی ءَ چہ اے شوبگ ءَ گوں بندوکیں 40 ءِ نزیک ءَ مزنیں صنعت آناں دیمروئی رسیت ھموادا معاشی کار ترند بنت ءُُ ورنا ءُُ بلدکاریں مردم آناں نوکری ءُُ روزگار ءِ موہ رس انت، مزن وزیر ءَ صوبائی حکومت آناں پنت ءُُ شون کت کہ جوڑیشت ءِ شوبگ ءَ گوں سیادی داروکیں صوبائی ٹیکسز آنی استیں سیم سر آناں کم کنگ ءِ سر ءَ چار ءُُ بچار کنگ بہ بیت تانکہ جوڑیشت ءِ شوبگ ءَ را دیمروئی بہ رس ایت ۔ اے ھیالانی درشانی آئی ءَ پنچ شمبے ءِ روچ ءَ جوڑیشتی شوبگ ءِ دیمروئی ، نوکیں پاکستان ہاءوسنگ پروگرام ءِ چیر دستی ءَ سرج میں ملک ءَ گس آنی جوڑیشت ھاسیں رنگ ءَ کم کٹ کنوکیں مردم آناں وتی زاتی گس ءِ پجاری ءِ ھوالگ ءَ حکومتی منصوبگ آنی تہ ءَ انوگ ءَ تاں دیمروئی کار آنی سر ءَ چار ءُُ بچاری دیوان ءِ پاگواجئی کنان ءَ کت ۔ دیوان ءَ چیئرمین نوکیں پاکستان ہاءوسنگ اتھارٹی ، چیئرمین ایف بی آر، صوبائی چیف سیکرٹریز، صوبائی حکومت آنی گوما سیادی داروکیں اپسرگ ءُُ ایندگر شریک اتنت ۔ چیئرمین نوکیں پاکستان ہاوَسنگ اتھارٹی ءَ دیوان ءِ جوڑیشت ءِ شوبگ ءَ را دیمروئی ءُُ نوکیں پاکستان ہاءوسنگ پروگرام ءَ را پکوئیں رنگ دیگ ءَ انوگ ءَ تاں بوھوکیں دیمروئی کار آنی سر ءَ بریفنگ دات ۔ مزن وزیر ءَ را گوشگ بوت کہ جوڑیشت ءِ شوبگ ءِ دیمروئی ءِ واستہ پیسلہ کنگ بوتگ کہ جوڑیشتی بھر آنی سر ءَ جنوکیں سیلز ٹیکس ءَ را ھلاس کنگ بیت ۔ اے رد ءَ صوبہ پنجاپ، خیبر پختونخوا ءُُ بلوچستان ءَ اے پیسلہ ءِ جنگ ءِ منظوری دیگ بوھگ ءَ انت ۔ مزن وزیر ءَ گوشت کہ ملک ءِ توا میں مزنیں شہر آنی تہ ءَ ماسٹر پلاننگ ءِ نوک سر چار ءُُ بچار گرگ ءُُ رد ءُُ بند دیگ ءِ کار ءَ را ترند کنگ بہ بیت تانکہ شہری آباتی، شہری آنی گیش پراھ ءُُ شاھیگان بوھگ ءُُ ایشانی آسراتی آنی پجاری ءَ را پکو ءُُ مھکم کنگ بہ بیت ۔ بنجاھی ءُُ صوبائی حکومت آنی ملکیت ءَ استیں کارمرد نہ بوھوکیں زمین آناں کم آمدنی کنوکیں مردم آنی واستہ ہاءوسنگ کالونی جوڑ کنگ ءِ ھوالگ ءَ گپ ءُُ تران کنان ءَ کت ۔ آئی ءَ گوشت کہ شہری آنی نزیک ءَ استیں زمین ھمودا توان ، آپ ، گیس ءُُ ایندگر شہری آنی آسراتی ءِ پجاری ءَ آسانی بہ بیت اے وڑیں زمین آناں ہاءوسنگ منصوبگ ءِ واستہ کارمرد کنگ ءِ واستہ دلگوشی دیگ بہ بیت ۔ آئی ءَ صوبائی چیف سیکرٹریز ءَ را پنت ءُُ شون کت کہ صوبائی حکومت آنی نیمگ ءَ چہ انوگ ءَ تاں نشان داتگیں زمین آنی سرج میں ھال یک ھپتگے ءِ تہ ءَ پجار کنگ بہ بیت تانکہ ایشانی کارمردی ءِ ھوالگ ءَ منصوبگ بندی کنگ بہ بیت ۔
