اسلام آباد ۔ 04 دسمبر (اے پی پی) وزیر مملکت موسمیاتی بدلی زرتاج گل پارینے کہ پاکستان تحریک انصاف اسٹ انگا جماعت ءِ ہرا غٹ ءِ انصاف ترفنگ آ باور کیک ۔ وزیراعظم عمران خان مسکوہی وزیراعظم نواز شریف تون انسانی ہمدردی نا بنا آ اونا درمان اٹی ہچ ءُ اڑاند اس شاغتو ۔ نجی ٹی وی چینل تون گپ و تران کرسا اوپارے کہ وزیراعظم عمران خان نا ہمدردی نا اپوزیشن ہم شاہدی ءِ تسنے کہ او تینٹ تعلقدار محکمہ غاتے پارت کریسس کہ او نواز شریف ءِ درمان نا گچین آسراتی فراوان کیر ونواز شریف نا جان جوڑی آ ہچ ءُ سیاست اس مف ۔ زرتاج گل پارے کہ اگہ مسکوہی صدر آصف علی زرداری تون اوار ایلو اپوزیشن راہشون تتون طبی بنداو تیا عدالت آتیان ضمانت منظور کرفک تو اومیت کیوہ کہ حکومت ایلوراہشون تتون ہم ہندا حکمت عملی ءِ اختیار کیک انتئے کہ پاکستان تحریک انصاف نا حکومت عدالتی پرمان تا شرف ءِ کیک ۔ وزیر مملکت زرتاج گل پارے کہ وزیراعظم عمران خان ملک آن وڈی خوری نا لعنت نا چٹفنگ کن چندی گام گیج آتیا عمل کننگ ءِ ۔ اسہ سوج اسے نا ورندی ٹی اوپارے کہ مستین نا حکومت آتے ٹی سرکڑدہ غاک ماحولیات نا کنڈا چکار کتوس ولے پاکستان تحریک انصاف نا حکومت بروک آ چین تیکن مچ آ ملک اٹی درخت خلنگ نا بھلو کچ اسے آ مہم نا بناءِ کرینے و دا مہم آن ماحولیات اٹی گچینی بریک ۔
