اسلام آباد ۔ 04 دسمبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ چنکا وام (مائیکرو فنانس ) نا فراوانی آن حقدار تپہ ءِ نیزگاری آن کشنگ مریک ، مائیکرو فنانس ءِ مون آ دننگ کن سوگو زرگزران المی ءِ، معاشی ہدف آتا دوئی کننگ اٹ نجی بشخ ءِ حکومت نا دُوتے سبک کروئی مریک، ملکی زرگزران سوگو مسنے ہرانا جہانی کہول آ امنا ءِ کننگ انگ ءِ ۔ چارشنبے نادے آ داڑے اِرادے ئی مائیکرو فنانس کانفرنس آن تران کرسا سلاہکار خزانہ پارے کہ مائیکرو فنانس آن حقدار تپہ غاتے نیزگاری آن کشنگ مریک، مائیکرو فنانس ءِ مون آ دننگ کن سوگو زرگزران المی ءِ ۔ زرگزران نا شونداری ٹی نجی بشخ آتا کڑد ءِ تالان کرسا او پارے کہ معاشی ہدف و زرگزران نا سوگوی ٹی نجی بشخ ءِ حکومت نا دُوتے سبک کروئی مریک انتئے کہ معاشی سوگوی ٹی مائیکرو فنانس ءِ مون آ دننگک ۔ ڈاکٹر عبدالحفیظ شیخ پارے کہ ساڑی حکومت ءِ ہندن ءُ زرگزران اس ملا ہرا تنکی ٹی اختہ ئس، داحالیت آتون مون تننگ کن وخت آ گام گیج کننگا ہراٹی سوگوی دوئی کرین ۔ اوپارے کہ جہانی مالیاتی ادارہ و جہانی کہول آ پاکستان نا معاشی سوگوی و سرسہبی تے امنا کننگ انگ ءِ ، آئی ایم ایف اولیکو سہ ماہی جاچ اٹی پارینے کہ پاکستان ہدف آتے دوئی کرینے، معاشی و اقتصادی پڑاٹ سرسہبی تا ذکر ءِ کرسا اوپارے کہ ملک اٹی پورٹ فولیو زرکاری اسہ ارب ڈالر اسکان سرمسنے، براہ راست درملکی زرکاری ٹی 286 درسد ودکی مسنے ۔ بلوم برگ ڈالر ٹرمز اٹی اسٹاک مارکیٹ ءِ مسہ تُو اٹی دنیا نا غٹ آن گچین کارکڑد گی والا اسٹاک مارکیٹ گوندانے، ہنداوڑ موڈیز پاکستان نا درجہ بندی ءِ منفی آن سوگو کرینے، داڑان مچ آ دنیا ءِ کلہو ملانے کہ پاکستان اٹی معاشی سوگوی بسنے ۔ اوپارے کہ پاکستان اٹی برآمد آتے ٹی ودکی مسنے، برجا نسخان کیہی سال آن پد تدوک آ تُو سرپلس مس ، پرائمری بیلنس ہم سرپلس مس ۔ اوپارے کہ اقتصادی سرجزآتے مون آ دننگ کن صنعت آتے بجلی ، گیس و وام تیٹی اعانت فراوان کننگ انگ ءِ ہراڑان صنعتی سرجزآتے ٹی ودکی مسنے ۔ زرگزران نا شونداری ٹی چنکا و درمیانہ درجہ نا وام تا اہمیتءِ تالان کرسا او پارے کہ ساڑی حکومت مائیکرو فنانس اٹی کاروباری لاگت ءِ کم کننگ کن گام گیج کننگ ءِ ۔ حکومت مائیکرو فنانس اسکان رسینگ ءِ ودفنگ ءِ، ننا کوشست ءِ کہ نن مائیکرو فنانس نا پیداواری لاءخی ءِ ودفن تانکہ کم آن کم وسیلہ غاتیان زیات آن زیات فائدہ ہرفن ۔ اوپارے کہ بطور وزیر خزانہ اومیت کینہ کہ اوفتے چنکا و درمیانہ درجہ نا وام تا فراوانی ءِ پین گچین کننگ کن گچین سلاہ ملک ۔ سلاہکار خزانہ پارے کہ چنکا و درمیانہ درجہ نا وام تا مون آ دننگ اٹ حکومتی مخ تفی و مرکزی بینک انا کڑد اہمیت تخک ۔ اوپارے کہ پاکستتان اٹی بچت آتا کچ دہ درسد ءِ ، زرکاری نا ریٹ ہم 15 درسد ءِ ، ہنداوڑ دستاویزی زرگزران اٹی ہم ایلو ملک آتیان پدی ءِ ، مستین نا مالیاتی نسخان تا سوب آن نجی بشخ ءِ وام تا دستیابی متاثر مس ولے داسہ نظام اٹی گچینی کن پائیدار بنداو تیا گام گیج کننگ انگ ءِ ہرانا اثرآک مون آ بننگ ءُ ۔
