ڈپٹی اسپیکر قومی اسمبلی قاسم سوری نا ’’پاکستان ءِ مون تروک تعلیمی چیلنج آتون مون تننگ‘‘ نا سرحال آن قومی کانفرنس آن تران

اسلام آباد ۔ 04 دسمبر (اے پی پی) ڈپٹی اسپیکر قومی اسمبلی قاسم سوری پارینے کہ ملک ءِ اقتصادی تنکی آن کشنگ کن حکومت پوسکن ءُ کسر پٹنگ ءِ، حکومت نا پالیسی تا سوب ملک اٹی معاشی سوگوی بننگ ءِ ، اینو پاکستان نا اقتصادی شونداری نا بابت موڈیز، جہانی ادارہ غاتا رپورٹ آک غٹ انا مون آٹو ۔ وزیراعظم عمران خان ملک اٹی تعلیمی نظام ءِ گچین کننگ خواہک، ایس ڈی جیز فور انا ہدف آتے دوئی کننگ کن بنجا و صوبہ غا تا اسہ پنہ غا بننگ المی ءِ ۔ داخیال آتا درشانی ءِ او انسٹی ٹیوٹ آف سوشل اینڈ پالیسی سائنسز (آئی سیپس) نا کنڈآن ’’پاکستان ءِ مون تروک تعلیمی چیلنج آتون مون تننگ‘‘ نا سرحال آن اسلام آباد اٹی اڈہلوک آ قومی کانفرنس آن تران اٹی کرے ۔ اوپارے کہ پوسکن آ خواست آتا رداٹ تعلیمی نظام اٹی گچینی وخت انا اہم ءُ گرج اسے ۔ تعلیم ءِ لس کننگ اسہ بھلو قومی ءُ چیلنج اسے ۔ ڈپٹی اسپیکر قاسم سوری پارے کہ پی ٹی آئی ءِ حکومت اٹی بننگ آن پد بھاز انگا چیلنج آک مون تروک ئسر ، قومی خزانہ خورک و ادارہ غاک بھس ئسر ۔ اوپارے کہ اقتصادی تنکی آن ملک ءِ کشنگ کن ساڑی حکومت پرعزم ءِ ، ساڑی حکومت نا پالیسی تا سوب ملک اٹی معاشی سوگوی بننگ ءِ ، موڈیزو ایلو جہانی ادارہ غاتا رپورٹ آک اینو پاکستان نا اقتصادی شونداری نا بابت غٹ انا مون آٹو ۔ اوپارے کہ تعلیم اٹی چناتا اسکول ءِ ہلنگ فریشان کن عمل اسے، اومیت ءِ کہ تعلیمی اصلاحات اولیتی بنداو تیا کننگک ۔ اوپارے کہ اسہ وخت اس ئس ہراتم پیشن آن شہزادہ غاک پاکستان آ تعلیم کننگ کن بسرہ ، اینو ننا چناک تعلیم کن پیشن نا ملک آتیا ہِننگ ءُ ۔ اوپارے کہ خیبر پختونخواٹی تعلیم ءِ لس کننگ تون اوار بنداوی آسراتی فراوان کننگانے ۔ اوپارے کہ ایس ڈی جیز فور انا ہدف آتا دوئی کننگ کن بنجا و صوبہ غاتا اسہ پنہ غابننگ المی ءِ ۔ اوپارے کہ وزیراعظم ملک اٹی تعلیمی نظام ءِ گچین کننگ خواہک ، پوسکن آ خواست آتارداٹ تعلیمی نظام اٹی گچینی وخت انا اہم ءُ گرج اسے ، تعلیمی نظام اٹی گچینی کن کانود سازی نا سپورٹ ءِ کینہ ، ہر چار آ صوبہ غاتے ٹی گچین نصاب اتنگے، ننے اواری اٹ ہی نظام نا دا پرخ ءِ چٹفوئی مریک ۔ اوپارے کہ پاکستان دنیا ءِ امن و انصاف نا کلہو ایتک ۔