بلوچستان اٹی ایڈز انا دین نا مون ءِ توننگ کن حکومت سنجیدہ گام گیج کیک، انتئے کہ انڈز انا کسر ءِ ننے توروئی ءِ و نن ہمو وخت آ سرسہبی دوئی کننگ کینہ کہ نن غٹ اواری اٹ خلقت اٹی شعور وآگہی ودی کین، صوبائی وزیر جان جوڑی میرنصیب اللہ مری
کوءٹہ ۔ 03دسمبر (اے پی پی) صوبائی وزیر جان جوڑی میرنصیب اللہ مری پارینے کہ بلوچستان اٹی ایڈز انا دین نا مون ءِ توننگ کن حکومت سنجیدہ گام گیج کیک، انتئے کہ انڈز انا کسر ءِ ننے توروئی ءِ و نن ہمو وخت آ سرسہبی دوئی کننگ کینہ کہ نن غٹ اواری اٹ خلقت اٹی شعور وآگہی ودی کین، داوخت آ پاکستان اٹی ایڈ ز انا مریض آتا کچ 1لکھ 65 ہزار وخت اس کہ بلوچستان اٹی مریض آتا کچ 6ہزار آن زیات ءِ ننے اواری اٹ ایڈز انا توننگ کن کاریم کروئی مریک ۔ داہیت ءِ او سے شنبے نادے آ بولان میڈیکل ہسپتال اٹی صوبائی ایڈز کنٹرول پروگرام نا کنڈآن مرسی کور، لے جنڈ سوساءٹی نا کمک اٹ اڈ ہلوک آ ایڈز انا جہانی دے انا مناسبت اٹ اسہ سیمینار اسے آن تران کرساپارے ۔ دود اٹی بولان میڈیکل ہسپتال نا ایم ایس ڈاکٹر فہیم، ڈاکٹر احمد ولی و ایلوفک ہم ساڑی ئسر ۔ صوبائی وزیر میر نصیب اللہ مری پارے کہ ایڈز اسہ لاعلاج ءُ مرض اسے و دامرض انا برخلاف ننے اسلامی تعلیمات آتیا عمل کرسا زند ءِ تیر کروئی مریک انتئے کہ زند اللہ تعالیٰ نا نعمت اسے و ننے محتاط مرسا زند ءِ تیر کروئی مریک ۔ اوپارے کہ داسال ایڈز کنٹرول پروگرام بے کچ کچ اٹنگا وسلہ غاتیان پد ہم گچین کارکڑد پیش کرے و ایڈز انا جہانی دے انا مناسبت اٹ شعور و آگہی ودی کننگ کن 20 نومبر آن چندی سرجزآتا بناءِ کرے و اینو داہم ایسر آ سرمس دا چرجوئی ٹی ایڈز کنٹرول پروگرام تون اواری اٹ یونیسیف ، مرسی کور، لچنڈ سوساءٹی اساس پی کے، سوشیو پاک و راہشون ایف پی اے پی شاندار کڑد ادا کریر و کوءٹہ ٹی چندی وڑنا سرجز اڈ ہلک ہراٹی الس بھلو کچ اسے ٹی بشخ ہلک ۔ صوبائی وزیر پارے کہ بلوچستان ءِ ایڈز انا دین آن پاک کننگ کن ننے اسہ پکا ءُ عزم اسے تون اواری اٹ کاریم کروئی مریک حکومت بلوچستان ایڈز کنٹرول پروگرام نا وسیلہ غاتے ودفک تانکہ ایڈز کنٹرول پروگرام پین جوان وڑاٹ کاریم کننگ کے ۔ اوپارے کہ ایڈز انا جہانی دے ءِ اڈتننگ نا مسخت ایڈز انا مرض اٹی اختہ مریض آتون یکجہتی نا درشانی و خلقت اٹی شعور و آگہی تروئی ءِ کہ او ایچ آئی وی ایڈز آن بچر و احتیاط کیر ۔ میر نصیب اللہ مری پارے کہ ننے ایڈز انا مریض آتیان آخا بلکن مرض آن خار کننگے ۔ داوخت آ ایڈز کنٹرول پروگرام نا صوبائی منیجر ڈاکٹر افضل خان زرکون پارے کہ بیست نومبر آن نن تینا پارٹنر ادارہ غاتون اواری اٹ اولیکو وار سائیکل ریلی لیاقت پارک اٹی السی فیسٹیول چندی وڑنا ایلو سرجز و اویر نیس سیشن اڈ تس ہرافتا المی وڑاٹ گچین زہم تمک ۔ اوپارے کہ ایڈز کنٹرول پروگرام نا فعالیت کن حکومت ءِ وسیلی غاتا فراوانی آ چکار کروئی مریک انتئے کہ ایڈز اتون جنگ کننگ کن وسیلہ غاتا گرج ءِ و ایڈز بلوچستان اٹی کم مننگ نا جاگہ غا ودنگ ءِ و مریض آتا کچ اٹی ودکی مرسا کننگ ءِ ہراکہ بلوچستان کن خطرہ نا گھنٹی اسے داوخت آ صوبہ ٹی ایڈز انا مریض آتا کچ شش ہزار آن زیات ءِ گرج داہیت انا ءِ کہ خلقت و خاص کر ایڈز انا مریض آتے ٹی اویر نیس ودی کننگے تانکہ مریض درمان نا کنڈا چکار کیر و الس احتیاطی تدابیر اختیار کرسا زند ءِ جوان و رکھ وڑاٹ گدریفر ۔ سمینار آن مذہبی اسکالرقاری عبدالرشید ، ہیڈ آف گائنی ڈیپارٹمنٹ ڈاکٹر نجمہ غفار امان اللہ کاکڑ ئسک ہم تران کریر ۔ ایسر اٹی صوبائی وزیر پارٹنر ز ادارہ و ایڈز کنٹرول پروگرام اٹی گچین کارکڑد نشان تروک آتے ٹی شیلڈ بشخ وپانٹ کرے ۔
