میر حاصل بزنجو ءِ بلوچستان ءِ دمگ آواران ء َ آوار جتگیں 3پیرزالیں زالبولاناں یل کنگءِ لوٹ

اسلام آباد ۔ 3دسمبر(اے پی پی) نیشنل پارٹی ءِ بنجاہی راہشون سینیٹر میر حاصل خان بزنجو ءَ لوٹ کتگ کہ بلوچستان ءِ دمگ آواران ءَ آوار جتگیں 3پیرزالیں زالبول زوتاں چہ زوت یل کنگ بہ بنت ۔ اے ھیالانی درشانی آئیءَ سے شمبے ءِ روچءَ مزن گس لاجز ءَ پریس کانفرنس ءَ گوں تران کنان ءَ کتگ ۔ اے موہءَ سینیٹر میرکبیر شاہی ء ُپارٹی ءِ دگہ راہشون آئیءِ ہمراہ بوتگ اَنت ۔ آئی ءَ گشتگ کہ بلوچستان ءِ دمگ آواران ءَ چہ سے پیرزال 70سالی خیربی بی ، 60سالی سکینہ ء ُ 45سالی حمیدہ مائی ءَ را ناشناسیں مردماں چہ لوگاں چست کتگء ُ گوں وت بُرتگ، ما صدر ء ُ آرمی چیف ءَ گوں دزبندی کنا ں کہ آزالبولاناں زوتاں چہ زوت یل کنگءَ وتی کردءَ پیلو بہ کن اَنت ۔ میرحاصل خان بزنجو ءَ گشتگ کہ زالبولانی آوار جنگءِ جیڑہ ءَ را ما سینیٹءِ انسانی حقانی کمیٹی ءِ دیما پیش کناں ۔ آئیءَ گشتگ کہ ما میڈیاءِ سرج میں آجوہی ءِ سرءَ باور کناں ء ُ میڈیا الم آزات کنگ بہ بیت ۔