وزیراعظم عمران خان نا کماشی ٹی پاکستانی زرگزران سہی سمت اٹ جاری ءِ، پارلیمانی سیکرٹری ریلوے فرخ حبیب

اسلام آباد ۔ 03دسمبر (اے پی پی) پارلیمانی سیکرٹری ریلوے فرخ حبیب پارینے کہ وزیراعظم عمران خان نا کماشی ٹی پاکستانی زرگزران سہی سمت اٹ جاری ءِ ، موڈیز پاکستان نا زرگزران ءِ سوگو گوندانے، بلاول بھٹو زرداری ءِ تینا باوہ نا منی لانڈرنگ نا حساب ءِ تروئی ءِ، مسلم لیگ (ن) و پاکستان پیپلزپارٹی بینک اکاءونٹس منی لانڈرنگ کن کاریم اٹ اتسا کرینو ۔ سے شنبے نادے آ الیکشن کمیشن نا پیشن میڈیا تون گپ و تران کرسا اوپارے کہ موڈیز پاکستان نا اسہ سال و مسہ تُو انا کارکڑدگی ءِ منفی آن سوگو کرینے ۔ وزیراعظم عمران خان نا کماشی ٹی ملکی زرگزران سہی سمت نا کنڈا ہِننگ ءِ ۔ اوپارے کہ مسلم لیگ (ن) ملکی زرگزران ءِ تباہ حال دروشم اٹ ہلاہنا ۔ مسلم لیگ (ن) آن ہراتم حساب خواہنگک تو او نرنگ نا کسر ءِ اختیار کیک ولے نن ن لیگ ءِ نرنگ کن الیپنہ ۔ اوپارے کہ مسلم لیگ (ن) ارب آ روپئی نا گردشی وام تے ہلاسس ہناسس، ساڑی حکومت کڑزدار ملک ءِ وزیراعظم عمران خان نا کماشی ٹی سنبھالا تو حکومت نا کوشست آتا سوب آن ملک نئے بیرہ شونداری نا کسر آ روان مسنے بلکن ملکی زرگزران اٹی ہم گچینی بسنے ۔ فرخ حبیب پارے کہ اگست آن پد اسٹاک مارکیٹ اٹی 11000 نا ودکی مسنے وخت اس کہ ہندا تُو اسٹاک مارکیٹ اٹی 5000 ہزار ودکی ریکارڈ کننگانے ۔ پارلیمانی سیکرٹری خواست کرے کہ سپریم کورٹ آف پاکستان غٹ سیاسی جماعت آتا جانچ پڑتال ءِ اسہ جاگہ غاکے ۔ اوپارے کہ بلاول بھٹو زرداری جعلی بھٹو اسے، بلاول بھٹو زرداری ءِ پوسکن آ وزیراعظم نا تغ تا خننگ آ ہچ ءُ پابندی اس اف ۔ ہرا حکومت نا برخلاف سازش کننگ ءُ اوفتا سازش آک بے سہب مریرہ ۔ اوپارے کہ مسلم لیگ (ن) و پاکستان پیپلزپارٹی بینک اکاءونٹس منی لانڈرنگ کن کاریم اٹ اتسا کرینو ۔ اوپارے کہ ایکسپورٹ و ٹیکس ہلنگ اٹ ودکی مسنے ہراملکی زرگزران نا گچینی نا ضامن ءِ ۔