چیئرمین سینیٹ محمد صادق سنجرانی نا پاکستان فیڈرل یونین آف جرنلسٹس نا گچین کاری تیٹی سرسہب مروک آ پینل ءِ مبارکباد

اسلام آباد ۔ 03دسمبر (اے پی پی) چیئرمین سینیٹ محمد صادق سنجرانی پاکستان فیڈرل یونین آف جرنلسٹس نا گچین کاری تیٹی سرسہب مروک آ پینل نا صدر سینئر صحافی شہزادہ ذوالفقار ، نائب صدور پنجاب آن رانا پرویز حمید، سندھ آن لالہ اسد پٹھان، خیبر پختونخواہ غان بخت زادہ یوسف زئی و بلوچستان آن سلیم شاہد، جنرل سیکرٹری ناصر زیدی و ایلو فتے سرسہبی آ مبارکبادی تسنے ۔ چیئرمین سینیٹ پاکستان فیڈرل یونین آف جرنلسٹس نا پوسکن گچین مروک آ عہدیدار آتا پن تینا تہنیتی کلہو اٹی پارینے کہ میڈیا ریاست نا اہم ءُ تمبہ سے ہرا نئے بیرہ ملکی و درملکی حالیت و واقعہ غاتے تالان کیک بلکن ملک انا شونداری و شونہالی کن حکومت و اپوزیشن نا راہشونی ءِ ہم کیک ۔ اودا اومیت نا درشانی ءِ کرے کہ پوسکن گچین مروک آ قیادت پارلیمان و صحافت نا نیام اٹ رابطہ غاتے پین سوگو کننگ اٹ اہم کڑد اس ادا کیک ۔ اوپارے کہ آجو صحافت پوسکن آ دور انا اہم ءُ گرج اسے و پاکستان آجو میڈیا نا پالیسی آ عمل کننگ ءِ ۔ آجوئی صحافت نا مون آ دننگ کن ہر وڑگام گیج کننگ انگ ءِ ۔ صادق سنجرانی پارے کہ میڈیا الس ءِ بنداوی حق آتا فراوانی و راجی رویہ غاتے ٹی گچینی و ویل آتا ایسری کن کمکار ءِ ۔ اوپارے کہ میڈیا ءِ سوگو کننگ و آجو صحافت ءِ مون آ دننگ کن پارلیمنٹ نا کڑد ستاکڑزک ۔ صادق سنجرانی پارے کہ جمہوریت نا مون آ دننگ و ادارہ غاتا سوگوی کن میڈیا ہرا کڑد ءِ ادا کرینے او سفت نا قابل ءِ ۔ ڈپٹی چیئرمین سینیٹ سینیٹر سلیم مانڈوی والا ، قائد ایوان سینیٹ سینیٹر سید شبلی فراز، قائد حزب اختلاف سینیٹ سینیٹر راجہ محمد ظفر الحق ئسک ہم پاکستان فیڈرل یونین آف جرنلسٹس نا سرسہب عہدیدار آتے مبارکبادی تسر و دا اومیت نا درشانی ءِ کریر کہ پوسکن گچین مروک آ عہدیدار آک صحافی تا ویل آتے پبی وڑاٹ تالان کرسا تعلقدار فورم آن ایسر کننگ کن کمکار مریرہ ۔