اسلام آباد ۔ 03دسمبر (اے پی پی) اسپیکر قومی اسمبلی اسد قیصر معذور بندغ آتے کن خصوصی پارلیمانی کمیٹی اس جوڑ کننگ و ہر حد اسکان کانودی ازی کننگ نا عزم انا درشانی ءِ کرسا پارینے کہ اصل ہیرو تو ہمو بندغ آک ءُ ہرا بیدس لالچ آن معذور و راج انا اختہ مروک آ بندغ آتے کن تینا کڑد ءِ ادا کننگ ءُ، پارلیمنٹ خصوصی بندغ آتے مایوس کپک ۔ سے شنبے نادے آ پارلیمنٹ ہاءوس نا سبزہ زار آ خصوصی بندغ آتا بابت جہانی کہول آ اڈتروک آ دے انا مناسبت اٹ اڈ ہلوک آ دود آن تران کرسا اسپیکر قومی اسمبلی پارے کہ دا دود انا اڈتننگ نا بنداو کنا مسڑ ظلہ مسنے ۔ او کنے آن خواست کریسس کہ قومی اسمبلی نا کنڈآن خصوصی بندغ آتے کن دود اس اڈتننگے ۔ اوپارے کہ کنا مسڑ خصوصی بندغ آتا بابت ہم کاریم کننگ نا شونق تخک ۔ اوپارے کہ پارلیمنٹ خصوصی بندغ آتے مایوس کپک ۔ اوپارے کہ خصوصی بندغ آتا بابت کڑد ادا کننگ کن سینیٹ و قومی اسمبلی نا خصوصی کمیٹی اس جوڑ کننگ خوانہ، ہرا اسٹریٹ چلڈرن ، معذور بندغ و راج انا اختہ مروک آ تپہ غاتا بابت کانودی سازی اس سلاہ و سوج کیک ۔ دانا پڑوءِ اسہ ہفتہ ٹی کننگک و داکمیٹی ٹی ہمو قومی اسمبلی نا باسک آتے اوار کننگک ہرا دا عظیم مسخت کن تینا وخت ءِ رضاکارانہ وڑاٹ تننگ کیرہ ۔ اوپارے کہ ہراوخت آن ای بطور اسپیکر تینا زمواری تے سنبھالانٹ تو ای خصوصی بندغ آتے کن جوڑ کیہی ہند و ادارہ غاتا دورہ ءِ کرینٹ ۔ شیخوپورہ ٹی واقع ذہنی وڑاٹ معذور بندغ آتا ہسپتال نا دورہ ءِ کریٹ تو کنے معلوم مس کہ اصل کاریم ءِ تو دا بندغ آک کننگ ءُ ۔ قصور اٹی خصوصی بندغ آتے کن یونیورسٹی اس ہم جوڑ کننگ انگءِ ۔ ای دا غٹءِ خناٹ کنے محسوس مس کہ ننے انتس کہ کروئی ءِ اوفتے نن کپننگ اُن ۔ خصوصی بندغ و ایلو فتے کن کاریم کروک آک حقی وڑاٹ اللہ نا ولی ءُ ۔ ہنداوڑ خبیب فاءونڈیشن ہم خصوصی بندغ آتے کن بھلو کاریم اس کننگ ءِ ۔ اوپارے کہ سیاست دان انت کہ کاریم اس کیک تو اودے وونٹ انا لالچ مریک ولے دا بندغ آک بے لالچ آن کاریم کننگ ءُ و اوفتا کاریم ءِ خناٹ کنا است ہمو خلقت نا کنڈا مسنے ۔ ای ہم اوفتے تون رضاکارانہ وڑاٹ ورکر نا حیثیت اٹ کاریم کیوہ ۔ اسپیکر قومی اسمبلی پارے کہ کنا تعلق مڈل کلاس اسے آن ءِ، وخت اس ہم سجفتویسٹ کہ قومی اسمبلی نا اسپیکر مریوہ، عہدہ ہچ ءُ گڑاس مفک، نئے اوفتیا کس اس ناز کے ۔ عہدہ غاتیان ایڑتر مرسا است اٹ ملک و قوم اکن کاریم کروئی ءِ ۔ او یو این ڈی پی ، سائیٹ سیور، خبیب فاءونڈیشن و اخوت فاءونڈیشن نا دود انا اڈتننگ نا بابت کمکاری آ خصوصی منت واری ءِ ہرفے ۔ داکان مست خصوصی بندغ آتا بابت تینا کڑدءِ ادا کروک آ ادارہ غاتا ترانکار ڈاکٹر امجد صابری، یو این ڈی پی نا کنٹری ڈائریکٹر منزہ گیلانی، زالبول پارلیمنٹ نا باسک آتا پڑک وومن کاکس نا سیکرٹری جنرل منزہ حسن و مچ آ ملک آن بروک آ خصوصی بندغ آک ہم دود آن تران کریر و خواست کریر کہ معذور بندغ آتے پارلیمنٹ، صوبائی اسمبلی تتون اوار تحصیل و ضلع اسکان نمائندگی کن کانودسازی اس کننگے ۔
