اسلام آباد ۔ 03دسمبر (اے پی پی) صدر مملکت ڈاکٹر عارف علوی پارینے کہ پاکستان ہنگری تون تینا تعلقداری تے بھاز اہمیت ایتک و ہڑتوم آ ملک آتا نیام اٹ ہڑتوم آ کنڈآتا و یورپی یونین نا کہول آ رابطہ غاتے مون آ دننگ نا خواہندار ءِ ۔ ہڑتوم آ ملک آتا نیام اٹ ہڑتوم آ کنڈآتا واپار حقی لاءخی آن کم ءِ، پاکستان مقبوضہ جموں و کشمیر اٹی فسطائی بھارتی حکومت نا دوتے اٹ انسانی حق آتا خلاف ورزی تیا وخت اس ہم چپ سلپک و نن کشمیری ایلم تتون تفوک اُن ۔ اوداخیال آتا درشانی ءِ سے شنبے نادے آ داڑے ہنگری کن پاکستان نا پندار سفیر محمد اعجاز تون گپ و تران کرسا کرے ہرا ایوان صدر اٹی اوڑتون اوڑدہی کرے ۔ صدر مملکت پارے کہ پاکستان نا غٹ ہائی کمشنر ز و سفیر آک کشمیر نا ویل انا حقی پس منظر و بھارتی جارحیت ءِ بایدے تالان کیر ۔ اوپارے کہ پاکستان ہنگری تون تینا تعلقداری تے بھاز اہمیت ایتک ۔ ہڑتوم آ ملک آتا نیام اٹ ہڑتوم آ کنڈآتا واپار ءِ ودفنگ نا سخت گرج ءِ ۔ پاکستان اٹی زرکاری و خاص کر توانائی، کشت وکشار، فوڈ پروسیسنگ و دوائی جوڑ کننگ نا بشخ آتے ٹی بھلو وارخواہی اس ارے ۔ ہنداخاطران پندار سفیر ءِ ہنگری ٹی پاکستان نا اقتصادی و واپاری فائدہ غاتے مون آ ودفوئی مرے و ساڑی آ ادارہ جاتی وڑوڈول ءِ بایدے کاریم اٹ اتنگے ۔ صدر مملکت پارے کہ پاکستان سویلی ، نیامی و دے ٹکی ایشیا نا سنگم آ واقع ءِ و دانا اسٹریٹجک محل و وقوع خاص کر ہنگری نا ’’ایسٹرن اوپننگ‘‘ پالیسی نا رداٹ ہنگری نا اسہ جوان ءُ اسٹریٹجک و اقتصادی شریدار اس جوڑ کیک ۔ اوداہیت انا ستاءِ کرے کہ ہنگری نا پٹرولیم کمپنی مول پاکستان اٹی کٹیا کروک کاروبار کننگ ءِ ۔ پندار سفیر ءِ ہنگری نا ایلو کمپنی تے ہم پاکستان اٹی مول انا سرسہبی تا ماڈل آ عمل پیرا مننگ نا بایدے است بڈی ءِ کننگے ۔ سیل و سوات نا شونداری و مون آ دننگ و پاکستان نا آثار قدیمہ نامیرات آتا رکھ اکن حکومت نا کوشست آتا ذکر ءِ کرسا صدر مملکت پندار سفیر ءِ پارت کرے کہ او سیل و سوات ءِ مون آ دننگ و الس نا نیام اٹ رابطہ غاتے ودفنگ کن کاریم کے ۔ او ہنگری نا کنڈآن پاکستان نا طالب علم آتے 200 اسکالرشپ تننگ نا عمل نا ہم ستاءِ کرے ۔ اوپندار سفیر ءِ پارے کہ او پاکستانی برادری نا ویل آتے جوان وڑاٹ ایسر کننگ کن اوفتے تون رابطہ ٹی مرے ۔ اواومیت ظاہر کرے کہ پندار سفیر ہڑتوم آ ملک آتا نیام اٹ تعلقداری تے مون آ دننگ کن تینا گچین لاءخی تے کاریم اٹ اتیک ۔
