صدر ءِ مملکت ڈاکٹر عارف علوی ءِ ڈیجیٹل چاگرد ءَ مھک میں دیمروئی ءِ بن گپ ءِ سر ءَ گشتانک

اسلام آباد ۔ 2 دسمبر (اے پی پی) صدر مملکت ڈاکٹر عارف علوی ءَ گوشت کہ ڈیجیٹل ٹیکنالوجی ءِ کارمردی ءَ چہ آشوبی مٹ ءُُ بدلی دیم ءَ کئیت، پاکستان ءَ ھم ڈیجیٹل ٹیکنالوجی ءِ کارمردی ءَ چہ سیت زورگ بوت کنت، مارا پاکستان ءَ بنی آدمی آسراتی آنی دیمروئی ءِ واستہ دلگوشی کنگ لوٹ ایت ۔ دو شمبے ءَ ادا ڈیجیٹل چاگرد ءَ مھک میں دیمروئی ءِ بن گپ ءِ سر ءَ برجم داشتگیں کانفرنس ءَ گشتانک دیان ءَ صدر ءِ مملکت ءَ گوشت کہ چارمی کارگاھ آنی آشوب ءَ زندمان ءِ ھمک شوبگ ءَ ارزشتی ایں رند پد نکش کتگ ۔ آئی ءَ گوشت کہ ڈیجیٹل ٹیکنالوجی ءِ کارمردی ءَ چہ دگنیا ءَ آشوبی مٹ ءُُ بدلی سہرا بوھگ ءَ انت، ایشی ءَ چہ بازیں چیلنجز ھم دیم ءَ پیداک بوتگ اَنت ءُُ ایشی ءِ جوانیں رند پد ءُُ ھرابیں دوئیں نمونگ ءِ رند پد است انت، زندمان ءِ بازیں شوبگ آنی تہ ءَ ڈیجیٹل ٹیکنالوی ءِ جوانیں بھر آں چہ سیت چست کنگ بیت کنت ۔ صدر ءِ مملکت ءَ گوشت کہ مارا چار ءُُ تپاس گرگ لوٹ ایت کہ ڈیجیٹل ٹیکنالوی ءَ چہ چِتور سیت زرت کناں ءُُ چتور ایشی ءَ چہ سیت زوران ءَ الس ءِ واستہ آسراتی پیداک کنگ بیت کنت ۔ آئی ءَ گوشت کہ ڈیجیٹل ٹیکنالوجی ءِ وسیلگ ءَ الس ءِ گہبود ءِ پروگرام آنی تہ ءَ ھم کمک رس ات کنت، ایشی ءَ چہ احساس پروگرام ءَ را کامیات کنگ ءَ ھم کمک رسیت ۔ آئی ءَ گوشت کہ تجارت ءُُ کشت ءُُ کشاری شوبگ ءَ ھم ڈیجیٹل ٹیکنالوجی ءِ کارمردی ءَ چہ آشوب ءِ سہرا کنگ بیت کنت ۔ ڈیجیٹل ٹیکنالوجی ءَ چہ ھندی رنگ ءَ مزن وانگ ءُُ زانگی پڑ پیداک بنت ۔ آٗی ءَ گوشت کہ مھک میں دیمروئی ءِ واستہ گریب ءُُ امیر آنی نیام ءَ پرک ءُُ چاگردی جھل ءُُ برزی ھلاس بیت ۔ آئی ءَ گوشتے کہ زالبول آں ھوار پاکستان ءِ توا میں مردم آں چہ ڈیجیٹل آسراتی ءِ پجاری ءِ واستہ گامگیج کنگ بوھگ ءَ انت تانکہ ایشرا کارمرد کنان ءَ چاگردی ءُُ اقتصادی گہبود ی پروگرام آناں کامیات جوڑ کنگ ءَ کمک بہ رس ایت ۔