کولمبو۔ 02دسمبر (اے پی پی) وزیر خارجہ مخدوم شاہ محمود قریشی پارینے کہ پاکستان و سری لنکا نا نیام اٹ سوگو ءُ تعلقداری اسے، پاکستان، سری لنکا تون کیہی سال آتیا تالان، برادرانہ تعلقداری تے پین سوگو کننگ نا خواہندارءِ، ہڑتوم آ ملک آک تین پہ تینی، علاقائی و جہانی باندات آتیا اسہ ایلو ناپبی کمک ءِ کرینو، مقبوضہ جموں و کشمیر نا 80 لکھ کود ک و مظلوم کشمیری تے بھارتی ظلم آن نجات ترفنگ کن مچ آ دنیا ٹی ہر فورم آ توار بڑز کننگ اُن۔ داخیال آتا درشانی ءِ او دوشنبے نادے آ سری لنکا نا وزیر خارجہ ڈائنش گناوردینا تون اوڑدہی ٹی کرے۔ اوڑدہی ٹی ہڑتوم آ کنڈآتا تعلقداری، ڈیہہ نا حالیت آتون اوار تین پہ تینی است خواہی نا چندی باندات آتیا گپ و تران کننگا۔ اوڑدہی ٹی وزیر خارجہ تینا سری لنکن ہم منصب ءِ بطور وزیر خارجہ تقرری آ مبارکبادی تس۔ شاہ محمود قریشی پارے کہ پاکستان و سری لنکا نا نیام اٹ سوگوءُ تعلقداری اسے۔ پاکستان، سری لنکا تون کیہی سال آتیا تالان، دا برادرانہ تعلقداری تے پین سوگو کننگ نا خواہندار ءِ۔ ہڑتوم آ ملک آک تین پہ تینی، علاقائی و جہانی باندات آتیا اسہ ایلو نا پبی کمک ءِ کرینو۔ وزیر خارجہ تینا سری لنکن ہم منصب ءِ 5اگست آن پد مقبوضہ جموں و کشمیر اٹی برجا انسانی حق آتا خلاف ورزی و اوفتے ٹی ڈیہہ ءِ مون تروک گڑتی تیان معلومدار کرسا پارے کہ مقبوضہ جموں و کشمیر نا 80 لکھ کودک، مظلوم کشمیری تے بھارتی ظلم آن نجات ترفنگ کن مچ آ دنیا ٹی ہرفورم آ توار بڑز کننگ اُن۔ اوپارے کہ سری لنکن کرکٹ ٹیم نا ساڑی آ دورہ پاکستان آن، پاکستان اٹی انٹرنیشنل کرکٹ بحال مسنے۔ ہندا تُو انا ایسری آ پاکستان اٹی اڈ ہلوک آ اِراٹیسٹ میچ اٹی بشخ ہلنگ کن سری لنکن ٹیم انا بننگ نا چاری مرینہ۔ وزیر خارجہ تینا سری لنکن ہم منصب ءِ تینا کنڈآن تہنیتی چھٹی اس ہم تس ہراٹی او دے پاکستان آ بننگ و داڑے ساڑی بدھ مذہب نا تاریخی میرات آتے ہُننگ نا سلہ خلنگا۔ سری لنکن وزیر خارجہ ڈائنش گناوردینا سری لنکا غا بننگ آ وزیر خارجہ مخدوم شاہ محمود قریشی نا منت واری ءِ ہرفسا پارے کہ او پوسکن آ حکومت نا ٹہیفنگ آن پد سری لنکا نا دورہ ءِ کروک آ اولیکو وزیر خارجہ ءِ۔ ہڑتوم آ وزیر خارجہ غاتا ڈیہہ ٹی امن و سوگوی کن تین پہ تینی سلابت ءِ برجاتخنگ نا فیصلہ۔ سری لنکا نا وزیر خارجہ تینا مڈکیریئر سفارتکار آتا تربیت، پاکستان نا فارن سروس اکیڈمی ترفنگ نا خواست کرے ہرادے وزیر خارجہ مخدوم شاہ محمود قریشی است انا حب اٹ امنا کرے۔ وزیر خارجہ مخدوم شاہ محمود قریشی تینا سری لنکن ہم منصب ءِ پارے کہ پاکستان معاشی سفارتکاری نا بناءِ کرینے اوسری لنکن وزیر خارجہ ءِ پارے کہ او زوت آن زوت، تینا ملک انا گچین کاروباری شخصیت آتون اوار پاکستان آ برے تانکہ اوفتا اوڑدہی ءِ پاکستان اٹی ساڑی بزنس کمیونٹی تون کرفنگ مرے و داوڑ پاکستان و سری لنکا نا نیام اٹ ہڑتوم آ کنڈآتا واپار و زرکاری نا کچ اٹی ودکی کننگ مرے۔
