کولمبو۔ 02 دسمبر (اے پی پی) وزیر خارجہ شاہ محمود قریشی ڈل اتون اوار سری لنکا نا پوسکن گچین مروک آ صدر گوٹابایاراجاپاکسے تون اوڑدہی کرے۔ اوڑدہی ٹی ہڑتوم آ کنڈآتا تعلقداری، ڈیہہ نا حالیت آتون اوار تین پہ تینی است خواہی نا باندات آتیا گپ و تران کننگا۔ ڈی جی سویلی ایشیا و ترجمان وزارت خارجہ ڈاکٹر محمد فیصل، سری لنکا ٹی پاکستانی ہائی کمیشن نا سینئر کمامدارآک ہم داوخت آ ساڑی ئسر۔ وزیر خارجہ صدر گوٹابایاراجاپاکسے ءِ پاکستان نا سرکڑدہ و الس نا کنڈآن سری لنکا نا ہفت می صدر گچین مننگ آ دلی مبارکباد پیش کرے۔ وزیر خارجہ سری لنکا نا صدر ءِ صدر پاکستان ڈاکٹر عارف علوی نا کنڈآن تہنیتی چھٹی اس ہم تس۔ ہراٹی صدر سری لنکا ءِ مبارکباد تون اوار اوار دورہ پاکستان نا سلہ خلنگانے۔ مخدوم شاہ محمود قریشی پارے کہ ننکن داہیت ہم خوشی نا قابل ءِ کہ 70 دہائی ٹی پاکستان آن عسکری تربیت دوئی کروک آ شخصیت، اینو سری لنکا نا صدارت نا منصب ءِ سنبھالانے۔ اوپارے کہ ننے یخین ءِ نا منصب ءِ سنبھالنگ آن پد پاکستان و سری لنکا نا نیام اٹ برادرانہ تعلقداریک پین سوگو مریرہ۔ وزیر خارجہ پارے کہ سری لنکا نا الس ہراوڑ دہشت گردی نا عفریت نا ڈٹ کر مقابلہ ءِ کرینو او ستاکڑزک۔ اوپارے کہ خشک سالی، نوکاپ یا ہروڑنا قدرتی آفت آتون مون تروئی تمے تو پاکستان نا الس تینا سری لنکا نا ایلم تتون ہم کوپہ سلوک نظر بس۔ وزیر خارجہ سری لنکن صدر ءِ پاکستان نا کنڈآن بناکروک آ معاشی سفارتکاری آن معلومدار کرساپارے کہ پاکستان و سری لنکا نا نیام اٹ تین پہ تینی واپار و زرکاری ءِ مون آ دننگ کن بھلو وارخواہی اس ارے ہرافتیان فائدہ ہرفنگ ہڑتوم آ ملک آتے کن سود مند ثابت مریک۔ سری لنکا نا صدر گوٹابایاراجاپاکسے وزیر خارجہ مخدوم شاہ محمود قریشی ءِ سری لنکا غا بننگ آ بخیر اٹ پارسا، تہنیتی کلہو و دورہ پاکستان نا سلہ غا صدر پاکستان و پاکستان نا بڑزکو سرکڑدہ غاتا خصوصی منت واری ءِ ہرفے۔ داکان مست وزیر خارجہ شاہ محمود قریشی تینا ڈل اتون اوار صدارتی سیکرٹریٹ آ سرمس۔
