اسلام آباد۔ 02 دسمبر (اے پی پی) وزیراعظم نا سلاہکار خصوصی باندات نوجوانان محمد عثمان ڈار پارینے کہ پاکستان تحریک انصاف نا حکومت ”سرسہب ورناپروگرام“ آ خصوصی چکار کننگ ءِ تانکہ ورناتے واکدار کننگ مرے، وزیراعظم عمران خان نا کماشی ٹی حکومت ملک انا ورناتپہ غاتا آخبت ءِ رکھ کننگ و اوفتے وتواجہ کننگ کن سرسہب ورناپروگرام آ پبی چکار کننگ ءِ۔ دوشنبے نادے آ اسہ نجی ٹی وی چینل اسے تون گپ و تران کرسا اوپارے کہ ورناتپہ غاک ننا ملک انا تمبہ غاک ءُ و ساڑی حکومت اوفتے معاشی وڑاٹ وتواجہ جوڑ کننگ کن عملی گام گیج کننگ ءِ۔ عثمان ڈار پارے کہ پی ٹی آئی نا حکومت داہیت آ پکا یخین تخک کہ ورناتپہ غاک قوم انا حقی میرات ءُ، ہرا ملک انا پائیدار شونداری ٹی اہم ءُ کڑد اس ادا کننگ کیرہ۔ اوپارے کہ حکومت ورناتا لائخی تیان فائدہ ہرفنگ کن مخلصانہ کوشست کننگ ءِ تانکہ ملک انا معاشی شونداری ءِ المی کننگ مرے۔ اومستی پارے کہ سرسہب ورناپروگرام ساڑی حکومت نا اسہ گچین ءُ گام گیج اسے ہراٹی شفافیت ءِ باوری جوڑ کننگک۔ اوپیدوار کرے کہ پروگرام نا رداٹ ورناتے آسان شڑت آتیا وام تننگک۔ عثمان ڈار پارے کہ ننا ورناک بھاز لائخ ءُ و او دا قابل ءُ کہ پاکستان ءِ اسہ شون ہلوک ءُ ملک اس جوڑ کننگ کیر۔ اوپارے کہ پی ٹی آئی نا حکومت ملک اٹی آب اٹ تعلیم نا مون آ دننگ و کسبی تربیت نا وارخواہی تے ودفنگ کن ہم خصوصی گام گیج کننگ ءِ۔ اوپارے کہ 68 درسد آبادی نا وئی 30 سال آن کم ءِ اگہ اوفتا سہی راہشونی ءِ کننگے تو او ملک انا قسمت ءِ بدلیفنگ کیرہ۔ اوپارے کہ حکومت ورناتپہ ءِ وتواجہ جوڑ کننگ کن 100 ارب روپئی آن زیات نا فنڈ جتا کرینے و آزاد کشمیر گلگت بلتستان و ہر چار آ صوبہ غاتا ورناپروگرام نا رداٹ آسان وام فراوان کننگک ہراڑان ملک اٹی معاشی و اقتصادی سرجزآتے مون آ دننگ دوئی مریک و شونداری نا ہدف آتا دوئی کننگ ءِ المی کننگ مریک۔
