لاہور۔ 01دسمبر (اے پی پی) بنجائی وزیر سائنس اینڈ ٹیکنالوجی چوہدری فواد حسین پارینے کہ ہڑتوم آ ایوان تا پارلیمانی کمیٹی اس جوڑ کننگے، پارلیمنٹ ءِ بحیثیت ادارہ غٹ بایدے امنا کیر، بروک آبجٹ اٹی سائنس و ٹیکنالوجی نا بجٹ اٹی اسہ ہزار درسد ودکی کینہ، پاکستان چین نا کمک اٹ 2022ء ٹی سپیس مشن اس خلاء ٹی گدریفک، بجلی نا ترسیل نا نظام یکسر بدل مننگ والاءِ، 10 آن 15سال اٹی پاکستان اٹی وتارک و کھمبہ غاک چٹرہ، وزارت سائنس و ٹیکنالوجی بائیو ٹیکنالوجی آ پورو وڑاٹ فوکس کرینے،بروک آ10 سال اٹی بائیو ٹیکنالوجی آن چار بلین ڈالر نا برآمد آتے ودفینہ، پاکستان دنیا ٹی اولیکو ملک مریک ہرا تینا بیٹری آن چلینگوک ءُ بس درستی راستی کرفک، بجلی آن چلینگوک آ رکشہ و موٹرسائیکل زوت مارکیٹ اٹی بریکم، پاکستان اٹی زوت ہی شمسی پینل اس جوڑ مننگ ہم بناکیک۔ پوسکن آٹیکنالوجی ءِ کاریم اٹ اتنگ آن بیدس شونداری مننگ کپک۔ او یک شنبے نادے آ داڑے پاکستان کونسل آف سائنسٹیفک ریسرچ (پی سی ایس آئی آر) اٹی اسہ پریس کانفرنس اسے آن تران کریکہ۔ بنجائی وزیر پارے کہ آرمی ایکٹ اٹی ترمیم نا معاملہ بے کچ اہم ءِ، آرمی ایکٹ اٹی ترمیم آ امنائی اٹ مون آ ہنوئی مریک،آرمی چیف قمر جاوید باجوہ سول ادارہ غاتے سپورٹ کرینے، آرمی چیف نا ملازمت نا مد انا معاملہ قانودی آن زیات سیاسی حیثیت اس اختیار کرینے۔ اوپارے کہ ادارہ غاتا نیام اٹ امنائی کن اسہ پوسکن ءُ میثاق اسے نا گرج ءِ ہراڑکن ہڑتوم آ ایوان تا پارلیمانی کمیٹی اس جوڑ کننگے، وزیراعظم خواہک کہ ادارہ غاک اسہ ایلو نا شرف ءِ کیر۔ اوپارے کہ ادارہ غاتا ساڑی گری ٹی اختیار آتے ٹی بیلنس نا کمک اٹ سوگوی اتنگ کینہ، پارلیمنٹ ءِ بحیثیت ادارہ غٹ بایدے امنا کیر۔ اوپارے کہ اپوزیشن نا کڑد ءِ بایدے امنا کننگے، معاشی پالیسی تیٹی ہم اپوزیشن ءِ اوار دننگ نا گرج ءِ، ملکی ویل آتے اسہ بندغ اس و اسہ ادارہ اس ایسر کننگ کپک۔ اوپارے کہ کانود سازی کن امنائی نا گرج ءِ۔ اوپارے کہ وزیراعظم عمران خان نا است قوم اتون اوار دھڑکک، او نا ہچ ءُ جندی فائدہ اس اف۔ حکومت شیفکو تپہ نا گچینی کن جہد کننگ ءِم، وزیراعظم حقی وڑاٹ پوسکن ءُ پاکستان اس جوڑ کننگ خواہک، وزیراعظم ءِ طاقت و پروٹوکول اٹی ہچ ءُ دلچسپی اس اف۔ اومستی پارے کہ پوسکن آ ٹیکنالوجی ءِ کاریم اٹ اتنگ آن بیدس شونداری ممکن اف۔ سائنس و ٹیکنالوجی ٹی گچینی کن کاریم کننگ اُن۔
