اسلام آباد۔ 01دسمبر (اے پی پی) وزیراعظم نا خصوصی کمکار سید ذوالفقار عباس بخاری و علی نواز اعوان پارینو کہ کچہ انگا آبادی تا ویل آتا ایسری اولیت ءِ، ننے گمر ءِ کہ غٹ آن زیات چرچ پاکستان اٹی ءُ، سوات آن پنجاب و آزاد جموں و کشمیر نا نیام اٹ کسر اس جوڑ کننگ انگ ءِ تانکہ بدھ مت مذہب نا پیروکار جاپان، چین و کوریا غان ہندا کسر نا کمک اٹ پاکستان آ بریر و تینا مذہبی رسم آتا ادا کننگ کیر، کچہ انگا آبادی تیٹی دیر، گیس و ایلو ویل آتا زموار ایم سی آئی ءِ، دا ویل آتے ایسر کننگ حکومت نا فرض ءِ، اقلیتی برادری نا برام تا بابت کانودی ویل آتے زوت ایسر کننگک۔ اسلام آباد اٹی دیر انا بھلو ویل اس مون تروک ءِ ہرانا ایسری کن غازی بروتھہ آن دیر سپلائی نا ڈٹ اس تیار کرینن، زوت اسلام آباد و پاکستان نا الس ءِ تنکی تیان کشنہ، اسلام آباد اٹی دیر انا ویل انا ایسری کن 2 ارب روپئی نا ڈٹ اس اتنگ اُن تانکہ دا ویل پرو وڑاٹ ایسر مننگ کے۔ داخیال آتا درشانی ءِ اوفک یک شنبے نادے آ فل گوسپل چرچ اسلام آباد نا کنڈآن کرسمس نا بنائی دود آتا بنانا وخت آکریر۔ داوخت آ باسک قومی اسمبلی شنیلہ روتھ، باسک قومی اسمبلی جمشید تومس، پاکستان تحریک انصاف اسلام آباد ریجن نا صدر فرید الرحمان تون اوار پی ٹی آئی نا کارندہ و مینارٹی ونگ نا خلقت نا بھلو کچ اس ساڑی ئسر۔ وزیراعظم نا خصوصی کمکار اوورسیز پاکستانیز سید ذوالفقار عباس بخاری پارے کہ کرسمس نا بنائی دود آتا وخت آ پاکستان تحریک انصاف نا کنڈآن غٹ مینارٹی ونگ آتے مبارکباد پیش کیوہ۔ اونا پاننگ ئس کہ علی نواز اعوان اسلام آباد نا رہینگوک آتا راجی آسراتی کن کاریم کننگ ءِ، داجاگہ کن میگا پروجیکٹ آتا ہم بناءِ کرینن۔ اوپارے کہ نن مافیا نا نیام اٹ اختہ اُن، سی ڈی اے ٹی ہم بھلو کچ اسے آ مافیا معاملہ غاتیا کوزہ کرینو، ہر جاگہ غا مافیا ساڑی ارے، نن یک و نیم سال آن سی ڈی اے ٹی پرائیویٹ سیکٹر ءِ اتنگ خوانہ۔ اوپارے کہ حکومت اسلام آباد نا خلقت کن ماسٹر پلان اس جوڑ کرینے ہراڑکن پانزدہ باسکی کمیٹی اس جوڑ کرینن ہراڑا کاریم مننگ ءِ۔ اوپارے کہ کچہ انگا آبادی تا ویل آتا ایسری اولیت ءِ، ہرا وزیراعظم 6تُو اٹی کرتارپور ءِ ملنگ کیک او ہر انسان کن کاریم کیک۔ خصوصی کمکار پارے کہ ننے گمر ءِ کہ غٹ آن زیات چرچ پاکستان اٹی ءُ، سوات آن پنجاب و آزاد جموں و کشمیر نا نیام اٹ کسر جوڑ کننگ انگ ءِ تانکہ بدھ مت مذہب نا پیروکار جاپان، چین و کوریا آن دا کسر نا کمک اٹ پاکستان آ برسا تینا مذہبی رسم آتے ادا کننگ کیر، چرچ انا دیوال کن زوت سی ڈی اے تون ہیت کینہ، متکن آ چرچ ءِ اوقاف نا بست وبند اٹی اتسا عبادت تون سیل و سوات ءِ مون آ دننگ خوانہ۔ ذوالفقار عباس بخاری پارے کہ دسمبر حضرت عیسیٰ علیہ السلام نا تُو ءِ، اونا ودی دے بھاز اہمیت تخک، عیسائیت و اسلام اٹی اسیجا گڑاتیا بایدے سجفنگے۔ خصوصی کمکار پارے کہ بنجائی دارالحکومت زیباءُ شار اسے، دانا زیبائی کن انت کہ کمک اس مس کینہ۔ اونا پاننگ ئس کہ کچہ انگا آبادی تیٹی دیر و گیس کنکشن و ایلو ویل آک ضرور اریر دا ویل آتا زموار ایم سی آئی ءِ، داڑاچکار کننگ ناگرج ءِ۔ اوپارے کہ میئر اسلام آباد شیخ انصر عزیز نئے بیرہ تینا دور حکومت اٹی کاریم کتو بلکن ساڑی حکومت اٹی او بالکل کاریم کپننگ ءِ، اومیت کینہ کہ بروک آ دے تیٹی او رزلٹ اس ایتک۔ داوخت آ دود آن تران کرسا وزیراعظم نا خصوصی کمکار سی ڈی اے امور علی نواز اعوان پارے کہ نن الس تون ہرا وعدہ غاتے کرینن اوفتے پورو کینہ، پاکستان تحریک انصاف اجتماعی کاریم تیا یخین تخک۔ اوپارے کہ تحریک انصاف نا حکومت آن مست اسلام آباد نا شاری تا کوٹہ غا ایلو صوبہ غاتا خلقت بھرتی مسکہ، اقلیتی برادری نا برام تا بابت کانودی ویل آتے زوت ایسر کننگک، اقلیتی برادری نا ملازمت آتے ٹی 5درسد کوٹہ ءِ ولے اوفتے او کوٹہ اینو اسکان تننگتنے۔ اوپارے کہ اسلام آباد اٹی 2سد 6 ایم جی ڈی دیر انا طلب ءِ وخت اس کہ بیرہ 56ایم جی ڈی دیر دستاب ءِ، دیر انا ویل انا ایسری کن 2 ارب روپئی نا ڈٹ اس اتنگ اُن تانکہ دیر انا ویل پورو وڑاٹ چٹنگ کے۔
