اینخو مالی سال انا اولیکو سہ ماہی ناکرنٹ اکاؤنٹ نسخان سینزدہ سال آتے ٹی شیفکو کہول آ ئس
اسلام آباد۔ 01دسمبر (اے پی پی) بنجائی وزیر اقتصادی امور حماد اظہر پارینے کہ اینخو مالی سال انا اولیکو سہ ماہی نا ملکی کرنٹ اکاؤنٹ نسخان سینزدہ سال آتے ٹی شیفکو کہول آ ریکارڈ کننگانے، کاروباری آسراتی تا فراوانی نا بارواٹی جہانی رینکنگ اٹی ہم پاکستان نا درجہ بندی ٹی 28 پوائنٹ نا ودکی مس۔ داہیت ءِ او تینا ٹویٹ اٹی پارے۔ اوپارے کہ چار سال آن پد حسابات جاریہ مثبت ءِ، مسہ سال آن پد ایلو ملک آتیان زرکاری نا چرجوئی بحال مس، ہنداوڑ 19 اگست آن پد سٹاک مارکیٹ اٹی یانزدہ ہزار پوائنٹ نا ودکی مسنے۔ حماد اظہر پارے کہ مچ آ دنیا ٹی کاروباری آسراتی تا فراوانی نا بارواٹی جہانی رینکنگ اٹی پاکستان نا درجہ بندی ٹی 28 پوائنٹس نا ودکی مس، ملک اٹی 28 بشخ آتے ٹی پوسکن آ کاروباری وارخواہی تا پیش کش ءِ کننگانے۔ اوپارے کہ پاکستان ءِ وخت اس ہم دُن انگا اقتصادی تنکی تتون مون تروئی تمیتو ہرا فتے پاکستان مسلم لیگ 2018 ء ٹی ہلاسس ولے ملکی اقتصادی نسخان اٹی ہم وخت اس ہم داخہ دار کمتی متو ہراوڑ تحریک انصاف نادور حکومت نا اولیکو پانزدہ تُو تیٹی مسنے۔
