اسلام آباد۔ 01دسمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ ورناچینک ننا نہادی میرات و روشنا آخبت نا اومیت ءُ، ورناتا تغ تا تعبیر وزیراعظم عمران خان نا بنداوی مشن ءِ، ننے تینا ورناچین خاص کر طالب علم آتا خواری، دیانت داری و سچائی نا اصول آتیا مبنی کڑد سازی ءِ کروئی ءِ۔ داخیال آتا درشانی ءِ او یک شنبے نادے آ تینا ٹویٹ اٹی کرے۔ ڈاکٹر فردوس عاشق اعوان پارے کہ تینا حق آتا خواست طالب علم آتا ودوک آ شعور و فکر انا عکاسی ءِ، ہرابے کچ ستاکڑزک۔ اوپارے کہ ورناچینک ننا نہادی میرات و روشنا آخبت نا اومیت ءُ، ورناتا تغ تا تعبیر وزیراعظم عمران خان نا بنداوی مشن ءِ۔ اونا پاننگ ئس کہ طالب علم آتا حق انا رکھ و ویل آتا دمدستی ایسری کن وزیراعظم بنجا و صوبہ غاتے جامع حکمت عملی اس جوڑ کننگ نا پارت کرینے، ننے تینا ورناچین خاص کر طالب علم آتا خواری، دیانت داری و سچائی نا اصول آتیا مبنی کڑد سازی ءِ کروئی ءِ، داڑتون اوار اوار اوفتا متحرک کڑد ءِ راج انا آسراتی، قومی فائدہ و سلامتی تون ہم گرنچ کننگ ہم بے کچ المی ءِ۔ ڈاکٹر فردوس عاشق اعوان پارے کہ ننا طالب علم آک ہمو واک آک ءُ ہرافتے بروک آ دور اٹی ملکی شونداری کن پوسکن ءُ سوچ، بصیرت و ولولہ انگیز جمہوری سرکڑدہ ہی ءِ وجود اٹ اتوئی ءِ، ننا ورناک ہر چیلنج نا ڈٹ کر مقابلہ کننگ نا سوگو عزم تخرہ۔