پیپلزپارٹی نا یوم تاسیس آ بلاول پیرہ نا نظریہ غاتیا فاتحہ خوانسا ”ابو و اونا وڈی خوری ءِ بچفنگ“ کن جہد ءِ برجاتخنگ نا عزم کرینے
اسلام آباد۔ 30 نومبر (اے پی پی) بنجائی وزیر مواصلات و پوسٹل سروسز مراد سعید پارینے کہ پیپلزپارٹی نا یوم تاسیس آ بلاول پیرہ نا نظریہ غاتیا فاتحہ خوانسا ”ابو و اونا وڈی خوری ءِ بچفن“ کن جہد ءِ برجاتخنگ نا عزم کرینے، ہرامشن کن بلاول نا باوہ اودے حادثاتی وڑاٹ چیئرمین نا منصب ءِ تس اونا حقیقت اینو اسہ وار ولدا قوم آ پیدوار مس۔ بلاول نا تقریر آ ردعمل نا درشانی ءِ کرسا مراد سعید پارے کہ زرداری صاحب بلاول ءِ پیپلزپارٹی نا کماشی ءِ داخاطران تس کہ او بھٹو ازم آن جان ءِ کشسا مچ آ زور اونا وڈی خوری و ذات نا دفاع غا خلے۔ اوپارے کہ بلاول زرداری شاید میر پور آزاد جموں و کشمیر نا ضمنی گچین کاری آ نظر شاغنگ ءِ گیرام کرینے، میر پور اٹی آزاد کشمیر نا الس تحریک انصاف ءِ سرسہب کرسا دنیا ءِ پارینے کہ کشمیر نا حقی سفیر دیرءِ۔ بنجائی وزیر مستی پارے کہ بلاول زرداری مولوی صاحب تون اواری اٹ کشمیر ءِ جہانی منظر نامہ غان اسہ کنڈ کننگ اٹ بے کچ کلیدی کڑد اس ادا کرینے۔ اوپارے کہ بلاول باوہ و اونا وڈی خوری ءِ بچفنگ نا اسہ ٹکی ایجنڈا اس ہلسا میدان اٹی ءِ، باوہ نا دفاع ٹی اختہ پرچی والا چیئرمین وزیراعظم نا جنرل اسمبلی ٹی تاریخی تران ءِ خف توتنے۔ اوپارے کہ اللہ نا شکر ءِ سی پیک مون نا مرحلہ ٹی پترینگسا فاسٹ ٹریک آ چلینگ انگ ءِ و دیکی روٹ ءِ ہم سی پیک اٹی اوار کرسا حقیقت جوڑ کننگانے سوشل سیکٹر نا پروگرام، نیزگاری نا چٹفنگ، کشاری ملک مننگ نا سوب آن کشاری ڈٹ آک ہم سی پیک اٹی اوار ءُ۔ مراد سعید پارے کہ بروک آ تُو وزیراعظم عمران خان سی پیک نا رداٹ اکنامک زون تا ہم بناءِ کیک ہراڑان روزگار نا وارخواہی و زرگزران نا پہیہ چلینگک۔
