لاہور۔ 30 نومبر (اے پی پی) وزیراعظم عمران خان پارینے کہ پاکستان داوخت آ نازرک دور اسے آن گدرینگ انگ ءِ ہراڑکن معاشی سوگوی المی ءِ، آفیسر آتے ہروڑنا سیاسی زورآن آجو کرینن، ننے پوسکن آپاکستان اٹی متکن آ مائنڈ سیٹ ءِ بدل کروئی ءِ، متکن آ نظام داسہ چلینگ انگ کپک، الس نا خذمت ءِ کننگ بیوروکریسی نا اولی فرض ءِ۔ داہیت ءِ او ہفتہ نادے آ داڑے صوبائی بیوروکریسی و پولیس نا سینئر آفیسر آتون دیوان نا کماشی ءِ کرسا پارے۔ دیوان اٹی وزیراعلیٰ پنجاب سردار عثمان بزدار، چیف سیکرٹری و آئی جی پولیس ئسک ہم ساڑی ئسر۔ وزیراعظم نا خصوصی کمکار ڈاکٹر فردوس عاشق اعوان، سید ذوالفقار بخاری و بیرسٹر شہزاد اکبر ہم دیوان اٹی بشخ ہلکر۔ وزیراعظم پوسکن آ تعیناتی تیا آفیسر آتے مبارکبادی تس۔ او آفیسر آتیان تران کرسا پارے کہ شست انا دہائی ٹی پاکستان نا گورننس،م بیوروکریسی و پالیسی تا مثال آتے تننگاکہ، داوخت آ پاکستان اسہ نازرک ءُ دور اسے آن گدرینگ انگ ءِ، ہراڑکن معاشی سوگوی المی ءِ۔ وزیراعظم ملک انا معاشی سوگوی کن حکومت نا پالیسی و گام گیج آتا ذکر ءِ کرسا پارے کہ دا گام گیج آتیان زرگزران سوگو مننگ ءِ ہراڑ او تینا معاشی ٹیم ءِ مبارکبادی ایتک۔ اوپارے کہ بیوروکریسی و ایلو عہدہ غاتیا تعیناتی تے میرٹ آ کننگانے، نن تینا دور حکومت اٹی آفیسر آتے ہروڑناسیاسی دباؤ آن آجو کرینن، آفیسر آتے غٹ کاریم تے میرٹ آ کروئی ءِ، معاشی شونداری کن اسہ قابل بیوروکریسی سے نا بھاز اہم ءُ کڑد اسے۔ وزیراعظم پارے کہ پنجاب اٹی امن و ایمنی و گورننس نا نظام اٹی گچینی اتنگ نا گرج ءِ، ننے پوسکن آ پاکستان اٹی متکن آ مائنڈ سیٹ ءِ بدل کروئی ءِ، متکن آ نظام داسہ چلینگ انگ کپک۔ اوپارے کہ الس نا خذمت ءِ کننگ آفیسر آتا اولی فرض ءِ، حکومت آفیسر آتا ملازمت نا مد ءِ رکھ فراوان کیک۔ آفیسر آتے نیزگار بندغ آتا زند اٹی گچینی اتنگ کن کوشست آتے ترندی اتوئی ءِ، ہنداوڑ چناتا برخلاف ڈوہ انا توننگ آ خصوصی چکار کیر۔ آفیسر آتا کاریم نزور ءِ طاقتور نا برخلاف رکھ فراوان کننگ نا ءِ۔ وزیراعظم پارے کہ آفیسر آتون کانودی اتھارٹی ءِ ولے دا طاقت بیرہ الس نا خذمت و اوفتا زند اٹی گچینی اتنگ کن کاریم اٹ اتنگے۔ الس نا خذمت نما فرض ءِ۔ وزیراعظم پارے کہ مہالو تھانہ غاتے ٹی طاقتور ءِ رکھ فراوان کننگاکہ ولے داسہ نما زمواری ءِ کہ غریب ءِ طاقتور نا برخلاف رکھ فراوان کبو۔
