لاہور/اسلام آباد۔ 30 نومبر (اے پی پی) وزیراعظم عمران خان پارینے کہ مہذب راج تیٹی امیر و غریب نا نیام اٹ پرخ مفک، راج انا غریب و نزور تپہ غاتے بڑزاتنگ ننا مشن ءِ، ملکی معاشی حالیت اٹی سوگوی بننگ ءِ، داسہ اقتصادی بڑھوتری آ چکار کننگ اُن، مشکل معاشی حالیت آتیان پد ہم راج انا نزور تپہ غاتے بڑز ہرفنگ کن احساس نا پن اٹ مربوط پروگرام اس بناکرینن۔ داخیال آتا درشانی ءِ او ہفتہ نا دے آ داڑے حکومت پنجاب و نجی کمرشل بینک آتا نیام اٹ کشارگر آتے کشاری وام تا 3دے انا تہہ ٹی فراوانی ءِ المی کننگ نا معاہدہ غا دستخط نا دود آن تران کرسا کرے۔ داوخت آ وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان، وزیراعظم نا خصوصی کمکار سید ذوالفقار بخاری، وزیراعلیٰ پنجاب عثمان بزدار، گورنر سٹیٹ بینک ڈاکٹر رضا باقر، کمرشل بینک آتا نمائندہ غاک و ایلو بڑزکو کمامدارآک ہم ساڑی ئسر۔ وزیراعظم دود آن تران کرسا پارے کہ اینو اوڑکن خوشی اسے نا دے ءِ، اینو ہرا گام گیج ءِ چست کننگانے داڑان راج انا ہمو تپہ ءِ فائدہ رسینگک ہرافتے نن اگہ بڑز ہرفنہ تو ملک اٹی غریبی چٹک۔ وزیراعظم پارے کہ راج انا غریب پسماندہ و پدی سلوک آ تپہ غاتے ہرفنگ حکومت نا مشن ءِ۔ مہذب راج آتے ٹی امیر و غریب نا نیام اٹی پرخ مفک۔ انسانیت و انسانی قدر انا حامل راج آتا دا خصوصیت مریک کہ او تینا نزور و پدی سلوک آتپہ غاتے بڑز ہرفرہ۔ ہندا ننا پیارا پیغمبر خواجہ محمد ﷺ نا سنت ءِ، مدینہ نا ریاست نا مثال ننا مون آٹے ہراٹی ریاست راج انا نیزگارتپہ غاتا زمواری ءِ ہرفے۔ وزیراعظم پارے کہ چین 70کروڑ آن زیات شاری تے نیزگاری آن کشنگ نا سرسہب آزموندہ کرے، دا داسوب آن ممکن مننگ کرے انتئے کہ ریاست تینا شاری تا حالیت زار اٹی گچینی نا فیصلہ کریسس۔ وزیراعظم پارے کہ ہراوڑ گورنر پیدواری کرے نن پاکستان نا تاریخ نا مشکل انگا اقتصادی حالیت آتے ٹی راجی غریب و نزور تپہ غاتے بڑز ہرفنگ کن احساس نا دروشم اٹ نیزگاری نا چٹفنگ نا مربوط پروگرام اس بناکرین، دامسخت کن 200ارب روپئی جتا کننگانیم، دا ڈیٹا نا بنداو آ اسہ مربوط پروگرام اسے ہراٹی پین گچینی اتنگ انگ ءِ۔ احساس پروگرام نا رداٹ نیزگاری نا چٹفنگ نا غٹ پروگرام تے مربوط کننگانے، ہراٹی راج انا نیزگار تپہ و زالبول آ خصوصی چکار کننگانے داکان بیدس ورناتے روزگار کن وام ہم تننگ انگ ءِ۔ وزیراعظم پارے کہ دا پروگرام نا سرسہبی کن ڈیٹا ءِ درست کننگ المی ءِ، نن پورو کوشست کننگ اُن کہ درست حساب وکتاب اس مرتب مرے تانکہ حقدار آتے داڑان فائدہ رسینگے۔ وزیراعظم عمران خان پارے کہ پاکستان نا 95 درسد بزغر 12ایکڑ آن کم ڈغارتا مالک ءُ۔ دا ہمو خلقت ءُ ہرافتے وام تا زیات ضرورت مریک۔ داکان مست پنجاب لینڈ ریکارڈ اتھارٹی و بھلا نجی کمرشل بینک آتا نیام اٹ چنکا بزغر آتے وام تا فراوانی کن معاہدہ غا دستخط مس۔ معاہدہ ٹی چنکا بزغر و کشارگر آتے کاروباری بینک آتیان باآسانی درکار وام تا دوئی کننگ اٹ کمک رسینگک پنجاب لینڈ ریکارڈ اتھارٹی 5کروڑ 50 لکھ آن زیات ملکیتی ریکارڈ ءِ درست تخنگ و سالانہ بنداو تیا 40 لکھ آن زیات صارف آتے خذمت فراوان کننگ نا محافظ ادارہ ءِ۔
