وزیراعظم عمران خان سموگ و چاگڑدی کچٹی نا مون ءِ توننگ کن جامع پروگرام اسے نا پڑو ءِ کرے
لاہور/اسلام آباد۔ 30نومبر (اے پی پی) وزیراعظم عمران خان سموگ و چاگڑدی کچٹی نا مون ءِ توننگ کن جامع پروگرام اسے نا پڑو ءِ کرے، 2020ء اسکان پٹرول یورو ءِ 4 آ گدریفنہ، شار انا تہہ ٹی بس آتے ہائبر ڈیابجلی آ چلیفنگک، خشت آتا بھٹہ غاتے زگ زیگ ٹیکنالوجی آ چلیفنگ کن مراعات تننگک، لاہور اٹی دہ سال اٹی 70 درسد درخت آتے کاٹ کننگا۔ ہفتہ نادے آ لاہور پریس کانفرنس آن تران کرسا وزیراعظم لاہور، گوجرانوالہ، فیصل آباد تون اوار ملک انا ایلو شار تیٹی سموگ و چاگڑدی کچٹی نا مون ءِ توننگ کن جامع پروگرام اسے نا پڑو ءِ کرے۔ اوپارے کہ سموگ آن بزرگ و چناک بھاز بے وڑ زہمی مننگ ءُ و داڑان دم انا ناجوڑی ترندی اٹ تالان مننگ ءِ۔ اوپارے کہ چاگڑدی کچٹی اسہ چُپ ءُ قاتل اسے۔ دا ویل بیرہ لاہور، گوجرانوالہ، فیصل آباد اٹی آخا بلکن کراچی و ایلو شارتیٹی ہم ارے۔ وزیراعظم چاگڑدی کچٹی نا مون ءِ توننگ کن گام گیج آتا پڑو ءِ کرسا پارے کہ نن 50 آن 60 درسد پٹرول پیشن آن درآمد کینہ، داسہ حکومت 2020ء اسکان پٹرول یورو ءِ 4آ گدریفنگ نا فیصلہ ءِ کرینے۔ داڑان چاگڑد اٹی گچینی آ 90 درسد اثر تمک۔ وزیراعظم ملک انا آئل ریفائنری تے مسہ سال انا تہہ ٹی تینا ٹیکنالوجی ءِ گچین کننگ ناپارت کرے۔ وزیراعظم پارے کہ برنج نا فصل آتے ہُشنگ نا جاگہ غا اوفتے کاریم اٹ اتنگک۔ داکان بیدس لاہور اٹی 60 ہزار کنال آ جنگلات دسنہ داڑان ہم تہو ساف مریک۔ وزیراعظم پارے کہ تدوک آ بیست سال اٹی حکومت آک چاگڑدی کچٹی نامون ءِ توننگ کن گام گیج کتوس۔ اوپارے کہ الیکٹرک گاڈی تیکن آٹو انڈسٹری تون ہیت وگپ چلینگ انگ ءِ۔ حکومتی گام گیج آن مسہ سال اٹی چاگڑدی کچٹی ٹی خاصی کمتی بریک۔
