کراچی۔ 30نومبر (اے پی پی) گورنر سندھ عمران اسماعیل پارینے کہ درملکی سیل و سواتی تا پاکستان نا کنڈآ ودوک آرجحان داہیت انا پیدوار شاہدی ءِ کہ پاکستان اٹی دودوربیدگ، راجی، گوازی تتون اوار ایلو مثبت سرجز آک تینا ترندی آٹو۔ حکومت نا گچین معاشی پالیسی تا سوب زرگزران اٹی سوگوی ودی مس و زوت الس ءِ دارداٹ ریلیف ملنگ بناکیک، ونٹیج کار ریلی نا اڈتننگ آن دنیا ٹی پاکستان نا مثبت دروشم تالان مننگ ءِ، ریلی آن سیل و سوات تون اوار اوار ایلو بشخ آتے ہم مون آ دننگ رسینگک۔ جاری اعلامیہ نا رداٹ داخیال آتا درشانی ءِ او ہیری ٹیج موٹرنگ کلب آف پاکستان نا کنڈآن خیبر پختونخوا آن بناکروک آ ونٹیج کار ریلی نا ایسری نا وخت آ گورنر ہاؤس اٹی میڈیا نا نمائندہ غاتون گپ وتران کرسا کرے۔ اسہ سوج اسے نا ورندی ٹی گورنر سندھ نا پاننگ ئس کہ ٹماٹر نا نرخ اٹی ودکی اونا فصل اٹی تاخیر نا سوب مس، داسہ فصل تیار مسنے تو ٹماٹر آتا نہاد اٹی کمتی خننگ انگ ءِ۔ دھرنہ نا بابت ہریفوک آ سوج آ گورنر سندھ نا پاننگ ئس کہ دھرنا تینا ایسر انجام آ سرمسنے، خلقت مولانا صاحب نا غٹ پلان تے مسترد کریر۔ حکومت ءِ اُراٹی تولفنگ نا جاگہ غا مولانا صاحب تینٹ تینا اُراغاکائے تولے۔ داکان مست گورنر سندھ اتون ہیری ٹیج موٹرنگ کلب آف پاکستان نا صدر محمد خان گورنر ہاؤس اٹی اوڑدہی کرے۔ داوخت آ کلب نا باسک توقیر سلطان ریلی نا بابت حوال ترساپارے کہ تدوک آ 30 سال آن دا ریلی ءِ اڈتننگ انگ ءِ وخت اس کہ تدوک آ 10 سال آن باقاعدہ ہر سال ریلی اڈتننگ انگ ءِ۔ ریلی اسہ سال کراچی آن بناکرسا خیبر آ چٹک وخت اس کہ بروک آ سال خیبر آن بناکرسا کراچی آ ایسر مریک۔ داسال ریلی ٹی ملائیشیا، جرمنی، کوریا، چائنا و ایلو ملک آتیان تعلق تخوک آ بندغ آک ہم بشخ ہلکر۔
