ملتان۔ 30 نومبر (اے پی پی) وزیر خارجہ مخدوم شاہ محمود قریشی پارینے کہ پاکستان تحریک انصاف نا حکومت آرمی چیف انا ودکی نا بابت کانودسازی اپوزیشن نا کمک اٹ کیک۔ ملتان اٹی ہفتہ نادے آ میڈیا تون گپ وتران کرسا وزیر خارجہ پارے کہ حکومت ءِ سپریم کورٹ نا سرجم فیصلہ نا انتظار ءِ۔ اوکان پد حکومت اپوزیشن جماعت آتے پت اٹ ہلیک و کانود سازی نا عمل ءِ مون آ دیک۔ اواومیت ظاہر کرے کہ اپوزیشن دا معاملہ ٹی زمواری نا درشانی ءِ کرسا حکومت تون کمک کیک۔ وزیر خارجہ مستی پارے کہ پاکستان تحریک انصاف ہمیشہ عدالت آتا شرف ءِ کرے و عدالتی معاملہ غاتے ٹی وخت اس ہم اڑاند ودی کتو۔ اوپارے کہ پی ٹی آئی کانود نا دنگ اٹ سلسا آرمی چیف ءِ توسیع تسوسس ولے عدلیہ گڑاس معاملہ غاتا پیدواری ءِ کرے و حکومت ءِ دا بارواٹی ودی مروک آ ابہام ءِ مرکننگ نا پارت کرے۔ وزیر خارجہ پارے کہ دا معاملہ ٹی کانود سازی آن آخبت نا حکومت آتے ہم فائدہ رسینگک۔ وزیر خارجہ مستی پارے کہ چیف آف آرمی اسٹاف جنرل قمر جاوید باجوہ ءِ ملک انا گیشتر فائدہ غاتے ودکی تننگا انتئے کہ پاکستان ءِ سیکورٹی نا چیلنج ہم مون تروک ءِ۔ اسہ سوج اسے نا ورندی ٹی اوپارے کہ پاکستان اوغانستان اٹی قیام عمل نا معاملہ ٹی تینا کڑد ءِ اداکننگ ءِ۔ مقبوضہ جموں و کشمیر نا معاملہ ٹی پاکستان جہانی کہول آ بھاز انگا سرسہبی تے دوئی کرینے۔ اوپارے کہ امریکہ دنیا نا اہم انگا ملک آتے ٹی شمار مریک و امریکی کانگریس اٹی کشمیر نا ویل ءِ اِراوار پیش کننگا ہرا بھاز اہم ءُ ہیت اسے۔
