اسلام آباد۔ 30 نومبر (اے پی پی) وزیر خارجہ شاہ محمودقریشی تون ملائیشیا نا وزیراعظم نا خصوصی ایلچی و نائب وزیر خارجہ داتو ویرا حاجی مرزوقی یحییٰ اوڑدہی کرے و ہڑتوم آ کنڈآتا تعلقداری و آمدہ کوالالمپور سرکڑدہ ہی دیوان نا بابت باندات آتیا گپ و تران کریر۔ دفترخارجہ نا کنڈآن جاری بیان نا رداٹ وزیر خارجہ شاہ محمود قریشی اوڑدہی ٹی ملائیشیا نا وزیر خارجہ ءِ کلہو سرکرے کہ پاکستان کوالالمپور سروک دیوان نا مسخت آتا مخ تفی ءِ کیک و سروک دیوان نا سرسہب اڈتننگ کن ملائیشیا تون اواری اٹ کاریم کیک۔ اوڑدہی ٹی ہڑتوم آ کنڈآتا تعلقداری، ڈیہہ نا حالیت آتون اوار تین پہ تینی است خواہی نا باندات آتیا گپ و تران کننگا۔ وزیر خارجہ ملائیشیا نا نائب وزیر خارجہ ءِ 5اگست آن مقبوضہ کشمیر اٹی جاری بدترین گھیڑ، انسانی حق انا خلاف ورزی و مقبوضہ کشمیر نا تازہ انگا حالیت آتیان معلومدار کرے۔ شاہ محمود قریشی پارے کہ مقبوضہ کشمیر اٹی جاری بھارتی ظلم انا برخلاف ملائیشیا ہراوڑ توار بڑز کرے او ستاکڑزک، کشمیر نا ویل آ پاکستان نا موقف نا پبی تائید و مخ تفی آ ملائیشیا نا است انا حب اٹ منت واراُن۔
