اسلام آباد۔ 30 نومبر (اے پی پی) وزیر خارجہ شاہ محمود قریشی پارینے کہ حکومت ملک اٹی خور انا کمتی نا ویل اتون مون تننگ و زچہ و بچہ نا مناسب خیالداری کن غٹ المی گام گیج چست کننگ ءِ۔ داہیت ءِ او زچہ و بچہ نا خور آن تعلقدار ورلڈ فوڈ پروگرام نا خصوصی سلاہکار و اردن نا شہزادی سارہ زید تون گپ وتران کرسا پارے ہراتدوک آ دے وزارت خارجہ ٹی اوڑتون اوڑدہی کرے۔ ترجمان دفترخارجہ نارداٹ وزیر خارجہ مخدوم شاہ محمود قریشی وزارت خارجہ غا بننگ آ شرفدار آ مہمان ءِ بخیر کرے۔ اوڑدہی ٹی ملک اٹی نادار و نزور تپہ غاتا خور و و آبی رکھ انا بابت باندات آتیا گپ و تران مس۔وزیر خارجہ ورلڈ فوڈ پروگرام نا رداٹ زچہ و بچہ نا بریبر خور انا بابت آگاہی و الس اٹی دا بابت شعور بیدار کننگ نا عزم انا ستاءِ کرے۔ وزیر خارجہ پارے کہ ساڑی حکومت پاکستان اٹی خور انا کمتی نا ویل اتون مون تننگ و زچہ و بچہ نا مناسب دیکھ بھال کن غٹ المی گام گیج آتے چست کننگ ءِ۔ اوپارے کہ وزیراعظم عمران خان قوم اتون تینا اولی تران اٹی خور انا کمتی و ملک اٹی چناتا نشوونما ٹی کمتی نا ویل آتون مون تننگ نا عزم انا درشانی ءِ کریسس ہراکہ ساڑی حکومت نا اہم اولیت آتے ٹی اوار ءُ۔ وزیر خارجہ شہزادی ءِ زالبول آتے واکدار کننگ و نیزگاری نا چٹفنگ کن بناکروک ”احساس پروگرام“ و دارداٹ چست کروک ایلو گام گیج آتیان معلومدار کرے۔ وزیر خارجہ نا سلہ غا پاکستان اٹی دا بشخ اٹی کاریم کروک آ مسہ نمائندہ تنظیم تا نمائندہ غاک ہم اوڑدہی ٹی ساڑی ئسر۔ ورلڈ فوڈ پروگرام نا سلاہکار و اردن نا شہزادی سارہ زید زچہ و بچہ نا بریبر خور انا بابت حکومت پاکستان نا کوشست و گام گیج آتا ستاءِ کرے و وزیراعظم عمران خان نا کنڈآن نیزگاری نا چٹفنگ کن بناکروک ”احساس“ پروگرام نا ستاءِ کرے۔
