آرمی چیف نا مد اٹی ودکی شش ہفتہ ٹی مریک، جنرل قمر جاوید باجوہ جمہوریت نا سرسہبی کن وزیراعظم و حکومت تون ہم کوپہ ءِ
لاہور۔ 30 نومبر (اے پی پی) بنجائی وزیر ریلوے شیخ رشید احمد پارینے کہ آرمی چیف نا مد اٹی ودکی شش تُو اٹی آخا بلکن شش ہفتہ ٹی مریک، اسہ سلاہ سے کہ دا کاریم ایکٹ نا کمک اٹ سادہ اکثریت آن مننگ کیک ولے اگہ آئین اٹی ترمیم نا ہم گرج مس تو دا پاکستان نا تاریخ اٹی اولیکو وار پیدوار اکثریت آن پاس مریک، آرمی چیف ءِ مسہ سال ملانے و ننا ہم مسہ سال سلوک ءُ، آصف زرداری نا پلی بارگین نا مارچ اسکان نتیجہ پیش تمک اوکان پد تازہ کیس بریک و متکن آ تینا مرک تینٹ کہیک۔ داخیال آتا درشانی ءِ او داڑے ریلوے ہیڈ کوارٹرز اٹی پریس کانفرنس کرسا کرے۔ شیخ رشید احمد پارے کہ جنرل قمر جاوید باجوہ کرتارپور راہداری نا کمک اٹ بھارت ءِ ہندن ءُ زخم اس خلکونے ہرادے او مچ آ زند یات تخک، دا گام گیج آن سکھ آتا است آتے ٹی پاکستان کن جوزہ و خوش دلی نا چاگڑد ودی مسنے، اوغانستان اٹی امن ءِ گچین کننگا ہرانا کریڈٹ ہم جنرل قمر باجوہ ءِ کاہک۔ اوغان ہچ ءُ قیمت اسے آ باڑ خلنگ نا موکل تننگ کن تیار الورہ ولے ولدا اوفک باڑ خلنگ نا موکل تسر۔ چین اتون تاریخی تعلقداری جوڑ کرے و بروک آ منہ دے اسکان ایم ایل ون نا بنامننگ والا ءِ، سعودی عرب، متحدہ عرب امارات و ایران تون پوسکن آ تعلقداری تا بندا ءِ تخنگانے۔ اوپارے کہ آرمی چیف جنرل قمرجاوید باجوہ جمہوریت نا سرسہبی کن وزیراعظم عمران خان و حکومت تون ہم کوپہ ءِ، آرمی چیف نا مد اٹی ودکی کن شش تُو انا مدت تننگانے ولے دانا شش ہفتہ ٹی فیصلہ مریک و دابابت ودی کروک آ ہیجان دم تسنے۔
