ملتان۔ 30 نومبر (اے پی پی) وزیر خارجہ مخدوم شاہ محمود قریشی پارینے کہ ہمسایہ غاتون پرامن تعلقداری و الس نا شونداری حکومت نا ایجنڈاٹی سرفہرست ءِ ولے بھارت نا غیر کانودی گام گیج سویلی ایشیا ٹی امن و شونداری ءِ نسخان تننگ ءِ۔ او ہفتہ نادے آ ایئر یونیورسٹی ملتان کیمپس نا ارٹ میکو کانووکیشن آن مہمان خاص نا حیثیت اٹ تران کریکہ۔ وزیر خارجہ پارے کہ نن ڈیہہ ٹی دیر پا امن کن مخلصانہ کوشست کننگ اُن۔ وزیراعظم عمران خان ہندا تُو انا اول اٹی کرتارپور راہداری نا بناءِ کرے ہرانئے بیرہ داکہ امن نا کنڈآپاکستان نا کوشست آتا درشانی ءِ بلکن دا راہداری نا بناداہیت انا ہم پیدواری ءِ کیک کہ نن پاکستان نا بارواٹی قائد اعظم نا ویژن آ بدل مفروک یخین تخک۔ وزیر خارجہ مستی پارے کہ کشمیر اٹی لاک ڈاؤ ن ءِ 116 دے مسنے مچ آ دنیا مقبوضہ کشمیر اٹی بھارتی ظلم انا مذمت ءِ کننگ ءُ۔ اوپارے کہ ننے یخین ءِ کہ بے گناہ کشمیری تا قربانیک گم مفسہ۔ اوطالب علم آتیا زور شاغا کہ او تینا تعلیمی سرجزآتے ٹی پبی چکار کیر و پاکستان نا شونداری ٹی ہم فعال کڑد ادا کیر۔ داوخت آ وزیر خارجہ و پاک فضائیہ نا سروک ایئر چیف مجاہد انور خان پاس مروک آ 493گریجویٹس آتے ٹی میڈل و ڈگری بشخا۔ پاک فضائیہ نا سروک ءِ چک 5فیض انا خڑک جوڑ مروک آ ایئر یونیورسٹی نا پوسکن آ کیمپس نا بارواٹی حوال ہم تننگا۔
