کوءٹہ ۔ 29 نومبر (اے پی پی) صوبائی وزیر داخلہ میر ضیاء اللہ پارینے تھانہ کلچر اٹی بدلی آن راج اٹی مثبت رجحان مون آ کاہک، ہر راج اٹی پولیس نا کڑد بے کچ اہمیت تخک ۔ السی غاو تا ازالہ ءِ کننگ کن بلوچستان پولیس ءِ پوسکن آ ٹیکنالوجی آن فائدہ ہرفوئی مریک ایلو صوبہ غاتے ٹی آن لائن ایف آئی آر نا درج کننگ آن پولیس نا مورال بڑز مسنے، صوبائی حکومت نا اولیت ہندادے کہ صوبہ نا الس نا ہر غاو نا دمدستی ازالہ ءِ کننگے و داہمووخت آ مننگ کیک کہ اسہ لس بندغ اس تینا غاو تے بیدس فریشانی و زور انا ننے اسکان سرکیک ۔ داڑکن ہراوڑ ایلو صوبہ غاتے ٹی آن لائن ایف آئی آر درج کننگ نا نظام اس جوڑ کننگانے ہراڑان بھلو حد اسکان غاوک ایسر مسنو ایلو صوبہ غاتا نسبت مستین اٹی بلوچستان ءِ زیات پسماندہ تخنگاسس ۔ ساڑی حکومت تینا الس ءِ انصاف نا خواست آتے پورو کننگ کن پوسکن آ ٹیکنالوجی اس درستی راستی کرفنگ نا خواہندار ءِ ۔ داڑکن تھانہ خوف ءِ ہموحالیت اٹ چٹفنگ مریک کہ ہر بندغ تینا غاوتے اُراٹی تولوک بڑزکو آفیسر اسکان سرکننگ کے ۔ ہراڑان کرپٹ عنصر آتا حوصلہ شکنی ، سفارش ، رشوت چٹک و انصاف نا زوت فراوانی ہم ممکن مننگ کیک ۔ داخیال آتا درشانی ءِ صوبائی وزیر داخلہ آن لائن ایف آئی آر سسٹم نا بابت تروک آ حوال نا وخت آ کرے داوخت آ ایڈیشنل چیف سیکرٹری داخلہ حیدر علی شکوہ، ایڈیشنل آئی جی پولیس محمد نعیم اکرم بروکاڈی جی لیویز مجیب احمد قمبرانی، ڈی آئی جی پولیس عبدالرزاق چیمہ و ایلو آفیسر آک ہم ساڑی ئسر اومستی پارے کہ بلوچستان نا ویل آتا ایسری اولیت ءِ ۔ صوبہ نا خلقت ءِ مون تروک ویل آتا ایسر کننگ و اوفتا جان و ماڑی تا رکھ و سلامتی ءِ المی کننگ حکومت نا زمواری ءِ ۔ صوبائی حکومت الس نا راجی و آسراتی و شونداری کن ہروخت کوشست کننگ ءِ ۔ ساڑی حکومت الس نا گیشتر فائدہ ٹی کاریم کننگ ءِ ۔ صوبائی حکومت وزیراعلیٰ بلوچستان جام کمال خان نا کماشی ٹی اسہ ٹیم ورک اسے نا رداٹ صوبہ نا پسماندگی نا چٹفنگ کن دے و نن گام گیج چست کننگ ءِ ۔
