اسلام آباد ۔ 29 نومبر (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ آزاد کشمیر و گلگت بلتستان اٹی معدنیات، سیل وسوات و ہائیڈل نا بشخ اٹی زرکاری نا بے پناہ وارخواہی ارے ہرافتیان پیشن نا زرکارآک پبی فائدہ ہرفنگ کیرہ ۔ داخیال آتا درشانی ءِ او سویلی کوریا نا پاکستان اٹی سفیر کواک سنگ کوئی تون گپ و تران اٹی کرے ہراجمعہ نادے آ داڑے اوڑتون اوڑدہی کرے ۔ اوڑدہی ٹی پاکستان و سویلی کوریا نا تین پہ تینی تعلقداری تیا سرجم گپ و تران کننگا ۔ داوخت آ بنجائی وزیر پاکستان نا جوڑ جاڑ و شونداری ٹی سویلی کوریا نا کمکاری نا ستاءِ کرسا پارے کہ سویلی کوریا نا زرکار کمپنیک پاکستان اٹی کیہی اہم ڈٹ آتے پورو کرینو ۔ اوپارے کہ سویلی کوریا نا شونداری نا ماڈل پاکستان نا شونداری ٹی ہم اہم کمکار مننگ کیک ۔ آزاد کشمیر و گلگت بلتستان اٹی زرکاری نا وارخواہی تے تالان کرسا بنجائی وزیر پارے کہ آزاد کشمیر و گلگت بلتستان اٹی معدنیات ، سیل و سوات و ہائیڈل نا بشخ اٹی بے پناہ لاءخی ارے ہراڑان سویلی کوریا نا زرکارآک پبی فائدہ ہرفنگ کیرہ ۔ اوپارے کہ آزاد کشمیر و گلگت بلتستان اٹی مذہبی سیل و سوات، ایڈونچر سپورٹس ہاکنگ، سکنگ تون اوار زیبا انگا جھیل و وادیک ءُ ہرافتیان چس ہلنگ کن لکھ آ سیل و سواتی ہر سال دا علاقہ غاتا کنڈا بریرہ ۔ اوپارے کہ حکومت نا گچین و شفاف پالیسی تا سوب آن پیشن نا سیل و سواتی تا کچ اٹی ہم زبردست ودکی مننگ ءِ ۔ اوپارے کہ اونا وزارت آزاد کشمیر و گلگت بلتستان اٹی زرکاری نا بابت ہروڑنا کمک و است بڈی کننگ ءِ ۔ اوپارے کہ ملک اٹی زرکاری نا چاگڑد پدریسہ گچین مسنے و معاشی ٹک آک مثبت رجحان تا پیدواری ءِ کننگ ءُ ۔ اوپارے کہ پاکستان اٹی کاروبار کننگ نا بابت انڈیکس اٹی ہم گچینی بسنے ہراڑان پیشن نا زرکارآتا پت اٹی ودکی مسنے ۔ بنجائی وزیر پارے کہ وزیراعظم پاکستان ملک انا شونداری نا بابت اسہ وژن اس تخک ہراٹی پیشن نا زرکاری نا است بڈی اسہ کلیدی ءُ حیثیت اس تخک ۔ اوڑدہی ٹی سویلی کوریا نا کمپنی تا آزاد کشمیر و گلگت بلتستان اٹی جاری شونداری ڈٹ آتا ہم جاچ ءِ ہلنگا ۔ داوخت آ وزارت امور کشمیر و گلگت بلتستان نا سیکرٹری طارق محمود پاشا ہم ساڑی ئس ۔
