اسلام آباد ۔ 29 نومبر (اے پی پی) امیر البحر ایڈمرل ظفر محمود عباسی پارینے کہ علامہ اقبال نا کلہو آ عمل کرسا نن تینٹ آگاہی نا کسر آ روان مننگ کینہ، نن اقبال نا کلہو ءِ پہہ مرسا بایدے اوڑا عمل کین، تانکہ نن اقبال نا تغ تا مسلمان و راج اکن فائدہ مند شاری مننگ کین ۔ ترجمان پاک بحریہ نا رداٹ پاک بحری نا سروک بحریہ یونیورسٹی اسلام آباد کیمپس نا کنڈآن علامہ محمد اقبال نا 142می یوم ودی دے انا بابت اولیکو اِرادے ئی قومی کانفرنس آن تران کریکہ ۔ کانفرنس نا سرحال ’’فلسفہ اقبال نا آفاقیت و اونا شخصی و راجی افادیت ‘‘ ئس ۔ امیر البحر پارے کہ علامہ اقبال نا کلہو آ عمل کرسا نن تینٹ آگاہی نا کسر آ روان مننگ کینہ ۔ اوپارے کہ نن اقبال نا کلہو ءِ پہہ مرسا بایدے اوڑا عمل کین تانکہ نن اقبال نا تغ تا مسلمان و راج اکن فائدہ مند شاری مننگ کین ۔ کانفرنس نا مسخت ورناچینءِ فلسفہ اقبال آن روشناس کرفنگ و علامہ اقبال ءِ خراج تحسین پیش کننگ ئس ۔ کانفرنس اٹی علامہ اقبال نا فلسفیانہ و عملی راہشونی و اسلامی ریاست اٹی اونا نفاذ نا جاچ ءِ ہلنگا ۔ امیر البحر ایڈمرل ظفر محمود عباسی تینا تران اٹی اقبال نا فکر ءِ مون آ تخسا فلسفہ اقبال نا قرآنی تعلیمات آتون تعلق ءِ بیان کرے ۔ دا کانفرنس بحریہ یونیورسٹی ٹی جوڑ’’اقبال چیئر‘‘ نا کنڈآن اڈتننگا ہرانا مسخت طالب علم آتے ٹی اقبال نا تعلیمات آتے مون آ دننگ نا ءِ ۔ اوپارے کہ بحریہ یونیورسٹی نا غٹ کیمپس آک ہم ویب لنک انا کمک اٹ دا کانفرنس اٹی بشخ ہلکر ۔ کانفرنس اٹی طالب علم ، استاد و مہمان اسکالر آتا بھلو کچ اس ساڑی ئسر ۔
