اسلام آباد ۔ 29 نومبر (اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ اسلام آباد ءِ ہیلتھ انا بابت ماڈل سٹی اس جوڑ کننگ انگ ءِ، پاکستان نا تاریخ اٹی اولیکو وار پرائمری ہیلتھ کیئر سسٹم ءِ سوگو کننگ انگ ءِ ، 16بنداوی ہند آتے کمیونٹی ہیلتھ سینٹر آتا وڑاٹ اپ گریڈ کننگ انگ ءِ ۔ داخیال آتا درشانی ءِ او شاہ اللہ دتہ کمیونٹی ہیلتھ سینٹر نا بناءِ کننگ نا وخت آ کرے ۔ ڈاکٹر ظفر مرزا پارے کہ غٹ جان جوڑی ہند و ہسپتال آک اسہ ہی ہیلتھ مینجمنٹ انفارمیشن سافٹ ویئر اس کاریم اٹ اتیرہ ۔ اوپارے کہ آئی سی ٹی ماڈل ہیلتھ کیئر گام گیج نا رداٹ بنداوی ہیلتھ سنٹر ءِ داسہ کمیونٹی ہیلتھ سینٹر نا پن تننگ انگءِ ۔ داتاریخی گام گیج آن بھلا ہسپتال آتیا مریض آتا رش و زور اٹی کمتی بریک ۔ کمیونٹی سینٹر اٹی داسہ درمان نا آسراتی تا دنگ ءِ ودفنگانے ۔ اوپارے کہ کمیونٹی ہیلتھ سینٹر آتے ٹی 94مرض آتا بنداوی درمان نا آسراتی تننگک ۔ کمیونٹی ہیلتھ سینٹر اٹی 24گھنٹہ ایمبولینس دستیاب مریک و دا سینٹر نا غٹ ریکارڈ کمپیوٹرائزڈ مریک ۔ اوپارے کہ مرض آتا تشخیص ، دوائی، دنان تا درمان آن ہلیس ذہنی مرض اٹی اختہ بندغ آتے مشورہ اسکان تننگک ۔ اوپارے کہ کمیونٹی سینٹر نا کمک اٹ خاہوتی ڈٹ بندی، مانع حمل اشیاء و سرجری نا آسراتی ہم ملک ۔ زچہ بچہ ، یورین ٹیسٹ، حمل ٹیسٹ، رکھی ٹیکہ جات نا آسراتی ہم دا سینٹر اٹی ارے ۔ ہیلتھ سینٹر اٹی بدہضمی ، قے، مخ انا خل و ایلو انفیکشن و درمان نا آسراتی دوئی مریک ۔ اوپارے کہ کمیونٹی ہیلتھ سینٹر اٹی ودی مروک آ چناتا طبی نگہداشت نا آسراتی ہم میسر مریک ، اوپارے کہ حکومت الس ءِ جان جوڑی نا بنداوی آسراتی تے اوفتا درگہ غا فراوان کننگ کن کوشست کننگ ءِ ۔ ہند آتے ٹی پیچیدگی نا حامل مریض آتے بھلا ہسپتال آتے ٹی ریفر کننگ نا ہم آسراتی دستیاب مریک ۔ اوپارے کہ ضروری طبی عملہ، دوائی، طبی ازباب و ایلو گڑاتا فراوانیءِ ہم المی کننگک ۔
