استیں حکومت پاکستان ءَ وردن ءُُ وراک ءِ کمی ءِ جیڈھ ءَ گوں گر ءُُ چیل ءِ واستہ جزمیگ انت، مزن وزیر عمران خان
اسلام آباد ۔ 28 نومبر (اے پی پی) مزن وزیر عمران خان ءَ چُک ءُُ مات ءِ وردن ءُُ وراک ءِ بابت ءَ ورلڈ فوڈ پروگرام ءِ ھاسیں مشیر ءُُ اردن ءِ شہزادی ءِ سارہ زید ءَ پنچ شمبے ءِ روچ ءَ مزن وزیر کارگس ءَ گند ءُُ نند کت ۔ مزن وزیر کارگس ءَ جاڑی بوتگیں بیان ءِ رد ءَ مزن وزیر عمران خان ءَ شرپ مندیں مہمان آناں وش اتک کنان ءَ گوشت کہ چُک ءُُ مات ءِ وردن ءُُ وراک ءِ ھوالگ ءَ سرپد ی آنی گیشی ءِ واستہ آئی ءِ جزم ءَ را ساڑات ۔ مزن وزیر ءَ گوشت کہ استیں حکومت پاکستان ءَ وردن ءُُ وراک ءِ کمی ءِ جیڈھ ءَ گوں گر ءُُ چیل بوھگ ءِ واستہ جزمیگ انت ۔ عمران خان ءَ گوشت کہ آئی ءَ راج ءَ گوں وتی گشتانک ءِ تہ ءَ وردن ءُُ وراک ءِ کمی ءِ جیدھ ءَ ھوار ملک ءَ زھگ آنی رودگ ءِ تہ ءَ کمی ءَ گوں گر ءُُ چیل ءِ واستہ جزم ءِ درشان کت ایش استیں حکومت ءِ اولسرئی دلگوشی انت ۔ مزن وزیر ءَ شہزادی ءَ را زالبول آناں وت مستر جوڑ کنگ ءِ واستہ احساس پروگرام ءُُ گریبی ءِ ھلاسی ءِ ایندگر پروگرام آنی چیر دستی ءَ چست کتگیں گامگیج آنی ھوالگ ءَ سرپد کت ۔ اردن ءِ کوئین سارہ زید ءَ مزن وزیر ءَ را وتی تر ءُُ تاب ءِ ساھت ءَ پاکستان ءَ وتی دزگٹی آنی ھوالگ ءَ سرپد کت ءُُ چُک ءُُ ماتی وردن ءُُ وراک ءِ ھوالگ ءَ حکومت ءِ پاکستان ءِ کوشست آناں ساڑا کت ۔ آئی ءَ وردن ءُُ وراک ءِ کمی ءِ ھوالگ ءَ مزن وزیر ءِ بے دروریں سروکی ءِ توسیپ کت ءُُ ایشرا بے درور ءُُ بے مٹ ءُُ ارزشتی نامینت ۔
