کوئٹہ۔ 27 نومبر(اے پی پی) وزیراعلیٰ بلوچستان جام کمال خان پارینے کہ بلوچستان متبادل ذرائع اٹ توانائی نا پیدوار کن بے کچ جوان ءُ ڈیہہ اسے، زرکار کمپنی شمسی و ایلو ذرائع اٹ توانائی نا پیدوار نا دا وارخواہی تیان پبی فائدہ ہرفنگ کیرہ، صوبائی حکومت ہم شمسی توانائی نا پیدوار نا مون آ دننگ کن گام گیج کننگ ءِ و کشاری ٹیوب ویل آتا شمسی توانائی آ گدریفنگ نا ڈٹ زوت بناکننگ انگ ءِ، بلوچستان نا بجلی نا ویل آتا ایسری کن نیپرا، کیسکو و کے الیکٹرک ءِ ہم تینا کڑد ءِ ادا کروئی مریک۔ داخیال آتا درشانی ءِ او چیئرمین نیپراتوصیف ایچ فاروقی و کے الیکٹرک کمامدار آتون اڈ ہلوک آ دیوان اٹی کرے۔پارلیمانی سیکرٹری توانائی مبین خلجی،سیکرٹری توانائی شہریار تاج، ممبر نیپرارحمت بلوچ، چیف آپریٹنگ آفیسرکے الیکٹرک ئسک ہم اوڑدہی ٹی ساڑی ئسر ہرافک وزیراعلیٰ ءِ حب آن بیلہ ٹرانسمیشن لین نا اپ گریڈیشن نا سلاہ ئی ڈٹ انا سرجم آتیان معلومدار کریر۔ وزیراعلیٰ بلوچستان پارے کہ صوبائی حکومت توانائی نا بشخ اٹی زرکاری کروک آ کمپنی تتون شریداری کن تیارءِ، کے الیکٹرک لسبیلہ ٹی تینا بجلی نا نظام ءِ گچین کرسا و صوبہ نا چندی علاقہ غاتے ٹی شمسی توانائی نا ڈٹ جوڑ کرسا فائدہ ہرفنگ کیک۔اوپارے کہ گڈانی ٹی پاکستان ناچارمیکوبندرگاہ مننگ نا لائخی ساڑی ءِ ہراڑے حکومت صنعتی شونداری کن پنچ ہزار ایکڑ آ تالان اسپیشل اکنامک زون نا قیام نا ڈٹ اس جوڑ کرینے، اوپارے کہ کشاری ٹیوب ویل آتاسبسڈی حکومت آ اسہ بھلوبھاریم اسے، داٹیوب ویل آتے شمسی توانائی آ گدریفسا حکومت دا بھاریم ءِ کم کننگ خواہک،کیسکوہموکشاری ٹیوب ویل آتا ہم بل ہلنگ ءِ ہرا باریسنو، وخت اس کہ گڑاس علاقہ غاتے ٹی اسیجابلنگ ہم کننگ انگ ءِ، داکان بیدس بجلی نا بل تفروک آتا سوب آن بل ادا کروک آتے بجلی نا بندش تون مون تروئی تمک، داغٹ ویل آتا اولیتی بنداو تیا ایسری نا گرج ءِ،داوخت آ چیئرمین نیپرا باوری کرفے کہ بلوچستان بجلی نا ویل آتے ایسر کننگک۔ داکان بیدس وزیراعلیٰ بلوچستان جام کمال خان پارے کہ صوبائی حکومت قدرتی وسیلہ و معدنی کوڑی تا بشخ اٹی زرکاری نا دا غٹ ڈٹ آتا خیرمقدمءِ کیک ہرا بلوچستان و داجاگہ نا الس نا فائدہ ٹی مریرہ، صوبائی حکومت زرکاری کمپنی تتون معاہدہ غاتے ٹی شفافیت نا بنداو غٹ باندات آتے طے کرسا معاملہ غاتے مون آ دننگ کن پرعزم ءِ،معدنی کوڑی تا بھلا ڈٹ آتے ٹی چندی اسٹ گچین کمپنی استخواہی نا درشانی ءِ کرینو۔ نن خوانہ کہ زرکاری کمپنیک کسبی سوچ اتون بلوچستان آ بریرو حکومت بلوچستان تون مریس وختی معاہدہ کیرہرافتا فائدہ حکومت بلوچستان و زرکارکمپنی ہڑتوم آتے ملے۔داخیال آتا درشانی ءِ او چینی کمپنی ایم سی سی ٹی نا صدر مسٹر وانگ چی چینگ وایم آر ڈی ایل سیندک نا چیئرمین مسٹر ہی ژوپنگ تون گپ و تران کرسا کرے ہرافک سے شنبے نادے آ داڑے اوڑتون اوڑدہی کریر، اوڑدہی ٹی سیندک پروجیکٹ نا ودفنگ تون اوار معدنی کوڑی تا ایلو ڈٹ آتابابت باندات آتیا گپ و تران کننگا۔
