اسلام آباد۔ 27 نومبر (اے پی پی) وزیر خارجہ شاہ محمود قریشی پارینے کہ پاکستان نا افریقی ملک آتون گچین سیاسی و سفارتی تعلقداری ءِ، افریقی ملک آتون مثبت بامسخت و اسہ وڑ شونداری نا مسخت آتا اصول آتا رداٹ رابطہ غاتا خواہندار ءِ، ننے تین پہ تینی واپاری کچ ءِ ودفنگ نا گرج ءِ، معاشی سفارتکاری نا کمک اٹ زرگزران ءِ سوگو کینہ۔ اوداخیال آتا درشانی ءِ چارشنبے نادے آ داڑے وزارت خارجہ ٹی افریقی ملک آتے ٹی تعینات پاکستانی سفیر آتا اِرادے ئی کانفرنس نا بنائی دود آن تران کرسا کرے۔ اوپارے کہ نن بھاز خوش اُن کہ دا وخت آ صدر پاکستان داکانفرنس نا بنائی دود اٹی شریک ءِ، داکانفرنس نا اِرا بنداوی مسخت ءُ، اولیکو افریقی ملک آتون تینا رابطہ غاتا مون آ دننگ و ارٹ میکو پاکستان نا معاشی سوگوی کن عملی گام گیج کننگ ءِ۔ وزیر خارجہ پارے کہ افریقہ اسہ اہم ءُ براعظم اسے ہرا 54ملک آتیا تالان، 2.3 ٹریلین ڈالر نا جم اٹنگا جی ڈی پی نا حامل ءِ۔ اوپارے کہ پاکستان نا افریقی ملک آتون گچین سیاسی، سفارتی تعلقداری ءِ۔ اوپارے کہ پاکستان نا سیکورٹی فورسز امن کن اقوام متحدہ نا امن مشن نا رداٹ بھاز انگا افریقی ملک آتے ٹی خذمت سرانجام تسنو۔ وزیر خارجہ پارے کہ پاکستان این اے ایم و جی77، کون آ جہانی فورم تیا افریقی ملک آتون تفے، افریقی ملک آتا 700 ڈپلو میٹس، پاکستان نا فارن سروس اکیڈمی آن تربیت ہلنگ ءُ، ننے افریقی ملک آتون تینا واپار نا کچ ءِ ودفنگ نا گرج ءِ۔ اوپارے کہ نن معاشی سفارتکاری نا بناءِ کرینن ہرانا رداٹ نن برآمد آتے ودفنگ و کثیر الجہتی بشخ آتے ٹی کوشست آتے کاریم اٹ اتسا، سرکڑدہ نا وژن نا رداٹ زرگزران ءِ سوگو کننگ کن پرعزم اُن۔ اوپارے کہ نن افریقی ملک آتون مثبت، بامسخت و اسہ وڑ شونداری نا مسخت آتا تین پہ تینی اصول آتا رداٹ رابطہ غاتا خواہش مند اُن۔ کنے اومیت ءِ کہ دا سفیر آتا کانفرنس افریقی ملک آتون ننا تین پہ تینی تعلقداری و اقتصادی کمکاری ءِ پین سوگو کیک۔
