اسلام آباد۔ 27 نومبر (اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ لیڈرشپ نا نیت جوان مرے تو مشکل آک ایسر مننگ کیرہ، جوان ءُ لیڈراس جوان ءُ ٹیم اس جوڑ کیک، ساڑی حکومت نا وژن بنداوی جان جوڑی نا غٹ تر آسراتی تا فراوانی ءِ۔ داخیال آتا درشانی ءِ او آبپارہ زچہ و بچہ سینٹر پولی کلینک نا اپ گریڈیشن نا بنائی دود آن تران اٹی کرے۔ اوپارے کہ داڑے بننگ آن پد خوشگوار احساس اس مسنے انتئے کہ لیڈرشپ چائے ملک اسے نا مرے یا ادارہ سے نا مرے اگہ لیڈرشپ ایماندار مریک تو جوان ءُ ٹیم اس مریک و جوان انگا ٹیم ہی ادارہ غاتے جوان وڑاٹ چلیفنگ کیک۔ اوزچہ و بچہ سینٹر نا زوت پوروی کن ڈاکٹر شعیب نا گام گیج آتا ستاءِ کرسا پارے کہ داسینٹر ءِ مسہ تُواٹی اپ گریڈ کننگ و غٹ ویل آتا مون ءِ توننگ اونا بھاز بھلو سرسہبی اسے۔ اوپارے کہ بنجائی دارالحکومت اٹی 19 ہیلتھ سینٹر ئسر ولے اوفنکشنل الورہ۔ اوپارے کہ ساڑی حکومت نا وژن بنداوی جان جوڑی نا غٹ تر آسراتی تا فراوانی ءِ و دامسخت کن ماڈل ہیلتھ سسٹم اس جوڑ کننگ اُن ہرانا بنداو پرائمری ہیلتھ کیئر مریک۔ ہیلتھ کیئر سینٹر ز اٹی دمدستی وڑاٹ عملہ ءِ گدریفنگ نا بناءِ کرینن تانکہ دا ہیلتھ سینٹر فنکشنل مرے۔ اولیکو کمیونٹی ہیلتھ سینٹر شاہ اللہ دتہ ٹی پورو کننگانے۔ اوپارے کہ دا غٹ ہیلتھ کیئر سینٹر آتے اسہ سال اٹی پورو کرسا الس نا آسراتی کن کاریم نا بناءِ کیرہ۔ اوپارے کہ زچہ و بچہ سینٹر آن پولی کلینک آ بھاریم ءِ کم کننگ اٹ کمک رسینگک۔ پارلیمانی سیکرٹری جان جوڑی ڈاکٹر نوشین حامد پارے کہ پاکستان تحریک انصاف نا بنداو ہی جان جوڑی نا بشخ اٹی انقلاب اتنگ نا ئس۔ وزیراعظم عمران خان نا وژن الس ءِ جان جوڑی نا آسراتی تا فراوانی ءِ۔ او غریب آتے جان جوڑی نا آسراتی فراوان کننگ کن شوکت خانم ہسپتال ءِ جوڑ کرے۔ داڑان پاش مریک کہ او حقدار و پسماندہ تپہ غاتے جان جوڑی نا آسراتی تا فراوانی ٹی اونا جند است خواہی تخک۔ اوسلاہ تس کہ دازچہ بچہ سینٹر اٹی کنگرومدر کیئر کن بیڈ مختص کیر، داڑکن وزارت ہروڑآسراتی فراوان کیک۔ اوڈاکٹر شعیب نا کنڈآن کروک آ گام گیج آتا سفت ءِ کرے و پارے کہ ڈاکٹر شعیب نا چاروکی ٹی ہسپتال اٹی پین گچین گام گیج کننگک ہراڑان الس جان جوڑی نا آسراتی تیان فائدہ ہرفنگ کیرہ۔
