مزن وزیر عمران خان ءِ احساس پروگرام ءِ چیر دستی ءَ مالیاتی گامگیج ءِ ھوالگ ءَ مراگش ءَ گوں گشتانک

اسلام آباد۔ 26 نومبر (اے پی پی) مزن وزیر عمران خان ءَ گوشت کہ حکومتی اقتصادی پالیشی آنی سیم سر گریبی ءِ ھلاسی انت، احساس پروگرام گریب آنی بزگی ءِ ھلاسی ءِ بنگیج انت، گریبیں زالبول چاگرد ءِ ھمزوریں تبک انت، مئے اولی ترجی گریبیں زالبول آنی گریبی ءَ چہ در کنگ انت۔ اے ھیالانی درشانی آئی ءَ سئے شمبے ءَ احساس پروگرام ءِ چیر دستی ءَ مالیاتی گامگیج ءِ ھوالگ ءَ برجم داشتگیں مراگش ءَ گشتانک دیان ءَ کت۔ اے موہ ءِ سر ءَ ہالینڈ ءِ ملکہ میکسیما ھم ساڑی ات۔ مزن وزیر عمران خان ءَ مراگش ءَ گوں گشتانک دیان ءَ ہالینڈ ءِ ملکہ ءِ پاکستان ءَ آیگ ءِ پد ءَ شگر ءُُ منت گپت ءُُ گوشت کہ کوئین ءِ بنی آدمی دوستیگ ءِ کار آں گوں واھگ زور لائک ءِ ستا انت۔ آئی ءَ گوشت کہ سیاست ءَ آیگ ءَ پیسر چاگردی باسک ءِ بستار ءَ کار کتگ ءُُ سیاست ءَ ھم چاگردی ازمت آنی واستہ اتکگ آں۔ آئی ءَ گوشت کہ مئے حکومت پاکستان ءَ را یک گہبودی ریاست ءِ جوڑ کنگ واھشت ایگ انت۔ مزن وزیر ءَ گوشت کہ ریاست مدینہ ءِ راجدپتر ءَ اولی گہبودی ریاست ءِ بوتگ، ریاست مدینہ ءَ اولی رند ءَ چورا، جنوزام، گریب ءُُ لنگ ءُُ کور آناں آوانی ھک دیگ بوت ءُُ ریاست ءَ آوانی زمہ واری زرتگ۔ آئی ءَ گوشت کہ سردار ءِ دو جہان بنی کریم ﷺ ءِ زندمان مئے واستہ روژنائیں سبک ات، احساس پروگرام ھمے جوزگ ءِ چیر دستی ءَ بندات کنگ بوتگ، اے پروگرام باز ازمت آنی گوما تیار کنگ بوتگ۔ مزن وزیر ءَ گوشت کہ دگنیا ءَ گوستگیں سال آنی ساھت ءَ امیر ءُُ گریب ءِ اندر ءَ پرک گیش بوتگ، دگنیا ءِ گیشتریں دولت لستیں مردم آنی کرا انت ایش سک باز انت، مرچی من وتی ٹیکس ءِ بچارینگ ءِ واستہ آف شور کمپنی جوڑ کتگ۔ آئی ءَ گوشت کہ چین ءَ ھپتاد کروڑ مردم آناں گریبی آں چہ ڈن کش اتگ، اے بنی آدمی راجدپتر ءَ درستاں چہ مستریں کار انت ایشی ءِ درور نہ رس ایت۔ مئے توامیں پالیشی آنی بنیاتی لیکہ لس مردم چتور ءَ سیت ءِ تہ ءَ بہ بیت، احساس پروگرام اے کار آنی بندات کڈی انت۔ آئی ءَ گوشت کہ گوستگیں حکومت ءَ لس مردم ءِ گہبود ءِ در ءَ دلگوشی نہ داتگ ءُُ ایوک ءَ سیر لاپیں مردم آنی واستہ سسا کتگ۔ آئی ءَ گوشت کہ پاکستان ءَ سئے رنگ ءِ وانگ ءُُ زانگ ءِ نظام است انت۔ امیر ءُُ گریب آنی واستہ جتا جتائیں وانگ ءُُ زانگ ءِ نظام است، چاگرد ءَ توامیں آسراتی امیر آنی واستہ انت، آوانی واستہ جان سلامتی ءِ آسراتی ھم جتا انت، ٹیکس لس مردم دنت بلے گیشتریں آسراتی سیر لاپیں مردم آنی واستہ گیشینگ بوتگ انت۔ مزن وزیر ءَ گوشت کہ احساس پروگرام گریب آنی زبھری ءِ ھلاسی ءِ واستہ بنگیج انت۔ ہالینڈ ءِ کوئین میکسیما ءَ مراگش ءَ گشتانک دیان ءَ حکومت ءِ احساس پروگرام ءَ را ساڑات ءُُ گوشت کہ احساس پروگرام حکومت ءِ نیمگ ءَ چہ چست کتگیں جوانیں گامگیج ات، اے پروگرام ءَ چہ زالبول آناں مالی رنگ ءَ وت مستر جوڑ کنگ ءَ کمک رسیت۔ آئی ءَ گوشت کہ پاکستان ءَ زالبول آناں مالیاتی ازمت ءَ تاں دست رس ءِ کساس سک باز کم انت۔ آئی ءَ گوشت کہ احساس پروگرام ءِ مول ءُُ مراد اسپیشلیں مردم آنی آسودگی انت، حکومت احساس پروگرام ءِ کامیاتی ءِ واستہ سک باز دل یکیم انت۔ آئی ءَ گوشت کہ پروگرام ءِ وسیلگ ءَ بزگریں زالبول آناں وت مستر جوڑ کنگ ءَ انت، گوستگیں وھد ءَ اے وڑیں پروگرام حکومت ءِ دلگوشی نہ دیگ ءِ سبب ءَ کامیات نہ بوتگ اَنت۔