وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان نا ٹویٹ

او آئی سی گولڈن جوبلی دود آتے ٹی پاکستان نا نمائندگی کنکن شرف نا سوب ءِ، او آئی سی ءِ مچ آ دنیا ٹی ظلم وجور و بیدادی نا گواچی مسلمان تا ویل آتا ایسری کن پین فعال و گچین کڑد ادا کننگ ناءِ،
جدہ۔ 26نومبر (اے پی پی) وزیراعظم نا خصوصی کمکار حوالکاری وشین کاری ڈاکٹر فردوس عاشق اعوان پارینے کہ او آئی سی گولڈن جوبلی دود آتے ٹی پاکستان نا نمائندگی کنکن شرف نا سوب ءِ، او آئی سی سیکرٹری جنرل ڈاکٹر یوسف العثیمین ءِ داوخت آ وزیراعظم عمران خان نا کنڈآن خصوصی کلہو اتون دلی مبارکباد و نیک است خواہی تا درشانی ءِ کیوہ، اسلامی سروک ملک آتا دا فورم مسلم امہ نا رشتہ ءِ سوگو کننگ و گنڈنگ نا غٹ آن بھلا پلیٹ فارم ءِ، دادے مچ آ دنیا ٹی ظلم و جور و بیدادی نا گواچی مسلمان تا ویل آتا ایسری کن پین فعال و گچین کڑد ادا کروئی مریک، امہ ءِ مون تروک ویل و اسلامو فوبیا کون آ چیلنج آتون مون تننگ کن اسہ وڑ موقف و جامع حکمت عملی ترتیب تننگ نا گرج ءِ۔ سے شنبے نادے آ تینا ٹویٹ اٹی ڈاکٹر فردوس عاشق اعوان پارے کہ ناروے کون آ است ہسون واقعہ غاتا توننگ کن ضروری ءِ کہ غٹ مذہب آتا مقدس شخصیت و کتاب آتا شرف نا بابت جہانی کہول آ کانود سازی اس کننگے، دُن انگا واقعہ غاتے ڈوہ گوندنگے و مرتکب عنصر آتے بایدے سزا ملے۔ اوپارے کہ مظلوم کشمیری تا مخ تفی و اوفتے تون یکجہتی نا درشانی آ سیکرٹری جنرل او آئی سی نا منت واری ءِ ہرفنہ، دافورم آن کشمیری تا جمہوری بنداوی حق و وادی ٹی سنگین حالیت آتے تالان کننگ کن پین توار بڑز کروئی مریک، بھارت آ زور شاغنگے کہ کشمیر اٹی ریاستی دہشت گردی و انسانی حق انا پامالی و غیر انسانی پابندی تے دمدستی چٹفنگے۔ اوپارے کہ بابری مسجد نا فیصلہ بھارت نا سیکولر دروشم ءِ بے نقاب کرینے۔ اوپارے کہ او آئی سی نا بانی باسک مننگ نا ناطہ پاکستان خواہک کہ مسلم ملک آتا نیام اٹ معاشی تعلقداری ءِ مون آ دننگے و سائنس و ٹیکنا لوجی نا بشخ اٹی کمکاری ءِ پین سوگوی ملے۔