بنجائی وزیر اقتصادی امور حماد اظہر نا پاکستان انوویٹو فنانس فورم آن تران

اسلام آباد۔ 26نومبر (اے پی پی) بنجائی وزیر اقتصادی امور حماد اظہر پارینے کہ حکومت چنکا و درمیانہ درجہ نا واپار تون اوار ملک اٹی واپار و زرکاری ءِ مون آ دننگ کن جامع گام گیج کننگ ءِ، سمال اینڈ میڈیم انٹر پرائزز اتھارٹی (سمیڈا) کن جوڑ کروک آ پوسکن آ پالیسی ٹی ملک انا چنکا و درمیانہ درجہ نا واپار نا مون آ دننگ اٹ نمان ودکی مریک، کاروبار کن سازگار چاگڑد نا جہانی رینکنگ اٹی پاکستان نا پوزیشن اٹی نمان گچینی بسنے۔ داخیال آتا درشانی ءِ او سے شنبے نادے آ داڑے پاکستان انوویٹو فنانس فورم آن تران کرسا کرے۔ فورم نا بست و بند ءِ کارانداز پاکستان، بل اینڈ ملینڈا گیٹس فاؤنڈیشن، یوکے ایڈا و ایشیائی شونداری بینک اواری اٹ کریسر۔ بنجائی وزیر تینا تران اٹی پارے کہ پاکستان اٹی چنکا و درمیانہ درجہ نا کاروبار نا بشخ اقتصادی پڑاٹ بے کچ اہمیت تخک۔ دا بشخ ملک اٹی روزگار نا فراوانی ٹی اہم کڑد ادا کننگ ءِ۔ ملک انا جم اٹنگا قومی پیداوار اٹی چنکا و درمیانہ درجہ نا کاروبار نا بشخ 30 درسد نا خڑک ءِ ہراڑان دا بشخ انا اہمیت تالان مریک۔ حماد اظہر پارے کہ مستین نا حکومت آک چنکا و درمیانہ درجہ نا کاروبار نا مون آ دننگ آ ہچ ءُ چکار اس کتوس ہرانا سوب آن دا بشخ اٹی ہمو شونداری متو ہراکہ مروسس۔ چنکا و درمیانہ درجہ نا کاروبار نا بشخ ملک انا جم اٹنگا وام تا 7 درسد وصول کیک۔ ساڑی حکومت دا بشخ انا وام تے پرائیویٹ سیکٹر نا 7 درسد آن ودفسا 17 درسد اسکان دننگ نا ہدف ءِ مقرر کرینے۔ اوپارے کہ حکومت ورناتے روزگار نا فراوانی و اوفتے واکدار کننگ کن سرسہب ورنا اسکیم نا رداٹ آسان وام فراوان کننگ ءِ۔ اوپارے کہ سمیڈا کن جوڑ کروک آ پوسکن آ پالیسی سمال اینڈ میڈیم سیکٹر نا مون آ دننگ کن اہمیت تخک۔ حماد اظہر پارے کہ حکومت ملک اٹی کاروبار و زرکاری ءِ مون آ دننگ کن جامع گام گیج کننگ ءِ ہرانا گچین بھرم مون آ بننگ ءِ۔ جہانی بینک کاروبار اٹی آسانی تا بابت ساڑی آ رینکینگ اٹی داہیت ءِ پک کرینے کہ دا رینکینگ اٹی پاکستان اٹی کاروبار اٹی آسانی تا بابت جہانی رینکینگ اٹی 28 پوائنٹ آتا گچینی بسنے۔ اومیت ءِ کہ بروک آ سال داٹی پین ودکی مریک۔ اوپارے کہ حکومتی گام گیج آتے ٹی وصولی تا کچ اٹی گچینی بسنے۔ خراج فائلر آتا کچ اٹی اینخو سال 7 لکھ نا ودکی مسنے، ہرا ستاکڑزک۔ بنجائی وزیر پارے کہ ملکی زرگزران نا 30 درسد بشخ ایس ایم ایز اٹی کاریم کیک۔ بنگلہ دیش اٹی دا شرح 25وخت اس کہ ترکی ٹی دا شرح 39 درسد ءِ۔ بنجائی وزیر پارے کہ مالیات اٹی ویلیو ایڈیشن نا مون آ دننگ اہمیت تخک، حکومت دا رداٹ کاریم کننگ ءِ۔ حکومت کریڈٹ بیوروز ءِ لیسن جاری کننگ نا وڑوڈول ءِ گچین کننگ ءِ، وام تیان بیدس ایس ایم ایز ءِ ایلو گچین آسراتی تیٹی ودکی نا کمک اٹ شونداری وارخواہی فراوان کننگ ءِ۔ دارداٹ شونداری شریدار آتون اواری اٹ حکمت عملی اس جوڑ کننگ اُن۔ بنجائی وزیر پارے کہ پاک چین اقتصادی راہداری نا رداٹ توانائی، بنداوی پنجر و صنعتی شونداری نا ڈٹ آتیا ہم پیش رفت برجاءِ۔ حکومت ایس ایم ایز نا گرج آتیان جوان معلومدار ءِ و دارداٹ تینا زمواری تے پورو کننگ ءِ۔ اوپارے کہ اگہ ملک ءِ شون ہلوئی ءِ تو 90 درسد انٹر پرائزز آ چکار کروئی مریک۔